EDITORYAL - Sukod sa ka-gawasnon

Mahimong sukdanan sa pagka-gawasnon sa Ombudsman ang mga kaso nga giatubang nilang kanhi Presidente karon Rep. Gloria Macapagal-Arroyo, iyang bana nga si Atty. Miguel “Mike” Arroyo ug mga kalihim ubos sa iyang pamunoan.

Ubos sa 1987 nga Konstitusyon, ang Ombudsman maoy gitahasan sa pagsusi sa mga kahiwian sa gobyerno, mga binuang sa mga opisyal, ilabi na ang pagpangurakot sa kaban sa gobyerno.

Labing unang kaso nga imbestigahon sa Truth Commission ang fertilizer scam, apan daghang kampo ang nagduhaduha kun mosaler ba kining kasoha ini’g abot sa Ombudsman.

Kini tungod kay si Ombudsman Merceditas Gutierrez classmate ni Mike Arroyo.

Apan alang kang Gutierrez, higayon na kini nga ipamatuod sa mga Pilipino ang iyang katakus pagdumala sa maong independente nga constitutional body; nga dili siya magawongan ni bisan kinsa, bisan sa iyang mga suod nga higala ug sa kanhi Unang Pamilya.

Bisan si kanhi Pres. Arroyo ang nagtudlo kaniya sa puwesto, angayan timan-an ni Gutierrez nga dili ang kanhi Unang Pamilya ang iyang giserbisyohan, kun dili ang katawhang Pilipino.

Kay kun magbinuang si Gutierrez pinaagi sa paghatag og pabor-pabor sa pagpasaka og kasong kriminal sa mga nalambigit niining fertilizer scam ug sa uban pa unyang mga kaso nga masindulan sa Truth Commission, ang impeachment maoy ikaatbang sa katawhang Pilipino batok kaniya.

Apan ang angay ni Gutierrez mao ang pagsunod sa iyang konsensiya ug pagtuman sa sugo sa mga ebidensiya.