Librong gipangdam-ok

Usa ka concern citizen ang nagpahibalo kanako nga nag- awas ang bodega sa Department of Education Cebu Province sa mga libro nga gipundo lamang ug wala ipanghatag ngadto sa mga tinun-an sa lalawigan sa Sugbo.

 Ang maong reklamo gikonpirmar mismo ni Cebu Province DepEd Superintendent Dr. Arden Monisit. Apan dali niyang giklaro nga ang mga libro nga nagpundok sa ilang bodega diha nang daan sa dili pa siya ang labaw sa DepEd province. Iya usab nga gipasabot nga ang mga libro sobra ug ang uban dili magamit. Gawas niini, wa usab palita sa DepEd ang maong mga libro. Gihatod lang kuno sa mga publisher ang maong mga libro bisan pag wa mopalit niini ang ilang buhatan. Busa ila nang gipakuha sa mga publisher ang mga libro kay ila nang gamiton ang bodega.   

Sa iyang pag imbestigar sa nagtapun-og nga libro iya usab kunong nadiskobrihan ang daghang garden tools nga wa usab ipang apod-apod sa mga tinun-an sa lalawigan tungod kay mga depektoso.

Pastilan. Unsa kahay kasabotan sa mga opisyal sa DepEd ug mga publisher sa libro? Kun ikaw ang publisher og libro magpaprinta ug mohatod kaha ka og libro sa tawo nga wa mopalit nimo? Kun tinood man ugaling ang giingon ni Dr. Monisit nga gihatod lang ang mga libro bisan og wa mopalit niini ang ilang buhatan, ang mga opisyal sa DepEd ug mga publisher aduna gayoy sekretong kasabutan tungod kay kun ikaw ang publisher dili gyod ka magpaprinta ug mohatod sa mga libro ngadto sa tawo nga wa mopalit nimo kun wa ka makaseguro nga bayaran sa imong libro.