Uwahi sa lakang

Sulod sa 22 ka adlaw 41 ka mga kinabuhi ang nakalas tungod sa sunod-sunod nga aksidente sa kadalanan. Una ang aksidente sa Balamban nga mihunos sa kinabuhi sa 20 ka mga medical students nga taga nasud sa Iran ug sa driver-operator nga Pinoy. Ikaduha ang aksidente sa dakbayan sa Toledo nga mihunos og laing 4 ka mga kinabuhi sa mga manindahay daplin sa dalan. Ikatulo ang mas labing dugoon nga aksidente sa dakbayan gihapon sa Toledo diin 15 ka mga kinabuhi ang gikalas og ang ikaupat mao ang aksidente sa Argao nga mikalas og laing usa ka kinabuhi.

 Tungod ning maong mga aksidente dali nga nagtigum ang mga sakop sa Road Safety Council alang sa paghimo og tukmang lakang aron malikayan ang susamang hitabo. Nauyonan sa tigum ang kanunay nga pagpaubos sa road worthiness test sa tanang sakyanan ug ang pagpa-seminar sa mga driver niini.

Kining mga ahensiya sa gobyerno luoy gyod kaayo, kanunay lang gyod ni silang mauwahi sa ilang lakang. Kaniadto ra gyod ni sila nga mao pay ipanguros kun maigo na. Abi man lang kay daghan nang nangamatay sa aksidente sa kadalanan ipaubos na sa road worthiness test ang mga sakyanan ug pasimenaron na ang mga driver? Nganong wa man ni himoa sa taga LTO, LTFRB ug mga operators kaniadto sa wala pa ang disgrasya? Kay ila pang gipaabot ang maong dugoong aksidente aron sila molihok? Pagka toytoy!

Ang upat ka sunod-sunod nga aksidente sa kadalanan nga mihunos og 41 ka mga kinabuhi nagsilbi na unta kining leksyon sa mga ahensiya sa atong gobyerno nga gihagokan lang ang ilang mga katungdanan.