Mora mag way hidden agenda si Noynoy

Sa inaugural speech ni Noynoy, atong nakita nga wala siyay gitaguan nga buot niyang buhaton sukwahi sa iyang mga gipamulong. Simple kaayo ang iyang pakigpulong, directly addressed ngadto sa katawhan mismo nga maoy mihatag kaniya’g gahom ug katungod pagpamunoan sa nasud.

Kadaghan siya pakpaki, nagpasabot sa pag-uyon sa katawhan sa iyang mga gipamulong. Ang katawhan nga iyang giisip nga iyang boss, ug siya suloguon lang. Hinaut nga iya kining tumanon, aron mamahimo siyang panig-ingnan sa mga hambugerong taga-gobyerno, lisud kaayong duolon.

Ang iyang pakigpulong gitumong sa mga yanong lungsoranon, sa masa, bahala nag wa kasabut ang mga langyaw’ng dinapit. Alang kang Noynoy, ang mahinungdanon mao ang katawhan mismo.

Kay alang niya, mi-exist siya isip Presidente, tungod ug alang sa katawhan. Gani, sa atong pag-eskwela, maoy atong nakat-unan nga ang gobyerno gimugna tungod ug alang sa katawhan.

Mao usab unta kini ang mahisilsil sa utok sa tanang anaa sa gobyerno, nga anaa sila diha, dili aron lang makakaon, kundili, aron pag-alagad. Alagad nga pakapinan og pahiyom, dili kay magmug-ot ilabina’g hapit na ang alas 12:00 ug alas 5:00.

Akong pagalantawan, nga kun sinsero lang si Noynoy, ato rang makab-ut ang tiunay nga mga kausaban nga dugay na natong gihandom. Hinaut nga wala gayud siyay mga hidden agenda. Ug manghinaut usab kita nga ang mga tawo nga nag-alirong kaniya, wala usay mga hidden agenda, otherwise, sila ra mismo ang makaingon sa kapakyasan ni Noynoy.

Hinoon, sa atong makita, dili mga political protégées ang iyang gitudlo nga mga cabinet secretaries, kundili mga career executives. Wala kaniya ang pagbayad og mga utang sa politika. Mga political debts. Sila lang si Jun Davide ug Rene Almendras, garbo natong mga Sugbuanon, natudlo sila dili tungod sa utang kabubut-on ni Noynoy, kundili, tungod sa ilang kaligdong ug qualification. Sa ato pa, nakita ni Noynoy nga makatabang sila si Davide ug Almendras, sa iyang kampanya pagpatuman sa iyang giingon nga kung walang corrupt, walang mahirap. 

Matud ni Noynoy, dili kini campaign slogan lang, kundili, usa kini ka programa nga kinahanglan iyang buhaton, ug maoy mahitabo sulod sa iyang pagpamunoan. Lisud kini nga tahas – almost impossible. Pakyas ang tanang presidente nga miuna kaniya, taliwa sa ilang mga tinguha pag-eradicate sa corruption ug pagbuntog sa kawad-on.

Ang nahitabo, midagsang ang pangurakot, dili na mauwaw ang mga koruptista, ug misamot ang kawad-on. Busa, kinahanglan buligan si Noynoy. Ug tungod kay ang kusog ni Noynoy nagagikan man sa katawhan, atong ihatag ngadto kaniya ang tibuok natong kooperasyon, kay ang iyang kalampusan, kabulahanan natong tanan.