EDITORYAL - Pangitaon ang kamatuoran

Saad ngadto sa mga Pilipino ang Truth Commission nga gitukod ni Presidente Benigno Simeon Aquino III. Kini maoy mopreparar sa mga ebidensiya ug pruweba ug mo-prosecute sa mga tawo nga nakahimo og salaod batok sa katawhan.

Bisan sa reaksiyon sa pipila ka sektor sa pagtuo nga gitumong kini aron pagpanggukod sa kanhi Unang Pamilya ni Pres. Gloria Arroyo, desidido ang administrasyong Aquino sa pagpadayon sa maong komisyonado nga panguluhan ni kanhi Supreme Court chief justice Hilario Davide III.

Maayo nga lakang ang pagtukod sa Truth Commission. Gani, maayong himuon kini kada unom ka tuig ini'g kanaog sa presidente.

Sa ingon, walay presidente, iyang pamilya ug iyang mga sakop sa kabinete nga dili magmatngon sa ilang katungdanan kun kada human sa ilang termino adunay Truth Commission nga manghipos og ebidensiya aron pasakaan og kaso ug masilotan sila nga magbinuang sa puwesto.

Kun mahalangan si Pres. Arroyo, iyang pamilya ug iyang mga sakop sa kabinete sa pagkatukod sa maong komisyonado, mo-alma gayod sila ug moingon nga gitumong kini aron sa pagpanimalos.

Una, dili usa ka pagpanimalos ang pagbarog alang sa kagustohan sa katawhan nga mao ang pagpangita sa kamatuoran sa mga isyu panahon sa administrasyong Arroyo, sama sa 1) fertilizer scam, 2) ZTE national broadband deal, 3) Hello Garci, 4) midnight appointment, ug daghan pa.

Mao gani nga gihinganlan kini og "Truth Commission" tungod kay tumong ni Aquino niini mao ang pagpangita sa kamatuoran aron sa paghunong na sa "tanang mga isyu" nga naglimin sa kanhi administrasyong Arroyo.

Usa ka dakong hagit kang Davide ang pagpangulo sa komisyonado nga usa sa imbestigahonon mao ang kanhi lider sa nasud.