Tungod sa palpak sa kapolisan

Human sa pipila ka adlaw nga pagtago gikan sa mga sakop sa media nga nangita niya aron ma-interview nunot sa labing awahing kontrobersiya nga nalambigitan niya ug sa iyang sinagop, nitingog na si Mayor Socrates Fernandez aron pagtubag sa isyu.

Siya ug ang iyang sinagop nga si Joavan miadto sa usa ka sibyaanan aron sa pagpa-interview. Atol sa interview gihimakak ni Joavan ang pasangil nga siya nani-on og pusil sa nurse nga si Vincent Castrodes. Matud ni Joavan nga igo lang niyang gitudlo si Castrodes human sa diriyot nilang panagbangga. Si Mayor Fernandez sa iyang bahin nanalipod sa iyang pagpangabli sa sakyanan bisan kun ubos kini sa custody sa kapolisan.

Nakakita og lusot ang mayor aron mangulipas sa iyang gihimo pinaagi sa pag-ingon nga wala siya masayod nga ubos diay sa custody sa kapolisan ang sakyanan tungod kay matud niya way police line nga nagkoral niini.

Anad sa lantugi si Mayor Fernandez busa dili na ikahibulong nga iyang nakit-an ang buslot sa operasyon sa kapolisan aron magamit nga depensa sa iyang pagkakonsintidor. Tinuod nga walay police line nga gibutang palibot sa sakyanan, apan wala pa sab siya angu-angoha nga makalimot dayon sa presinsiya sa kapolisan nga mibadlong niya.

Dili ba gisuwayan si Fernandez sa duha ka polis nga gidistino ni Sr. Supt. Erson Digal pagbantay sa sakyanan? Wala ba ingna si Fernandez sa duha ka polis nga dili niya mahimong ablihan ang sakyanan kay ubos ni sa ilang custody ug nga naghuwat sila nga mo-isyu og search warrant ang korte?

Dili ba nga giwakli man ni Fernandez ang polis nga nibabag niya ug gipangutana kun unsay ilang problema nga siya may tag-iya sa sakyanan? Tinuod palpak og wala mosunod ang kapolisan sa hustong proseso sa operasyon apan wa ni magpasabot nga si Fernandez maoy nagsulti sa tinuod ug ang mga polis bakakon.