EDITORYAL - Hagit ni Mayor Soc

Maayo kaayong nakasumbalik og saway si Joavan Fernandez ngadto kang Sr. Supt. Erson Digal pinaagi sa pag-ingong “Limpyohi ang imong kaugalingong tugkaran.”

Ang reaksiyon ni Joavan masabot nga usa ka panimalos tungod sa paghingusog sa kapolisan sa lalawigan nga bantayan ang lihok sa sinagop ni Mayor Socrates Fernandez tungod sa walay puas niining pagkalambigit sa kagubot.

Apan ang labing maayong buhaton ni Joavan dili ang pagsaway sa hepe sa kapolisan kansang trabaho mao ang pagpatunhay sa kahusay ug kalinaw sa lalawigan ug ang pagdepensa sa mga tawo nga mabiktima sa mga bayolenteng tawo sama ni Joavan.

Ang labing maayong buhaton ni Joavan mao ang pagtulisok sa iyang amahan nga si Mayor Socrates Fernandez. Kay kun dili pa sa konsente ni Fernandez, dili ingon kahambugero ug kagaraon si Joavan.

Mapasalamaton ang mga Sugboanon nga aduna pay tawo nga sama ni Vincent Joe Castrodes nga dili mahaylo sa kuwarta ni Fernandez. Apan gihimo pa gyud ni Joavan nga bakakon si Castrodes pinaagi sa pagpasiatab sa iyang gimik nga andam siyang magpa-fingerprint aron ipamatuod nga dili iya ang armas nga nakit-an sa kapolisan sa iyang Isuzu Bighorn.

Utro pud si Fernandez, mitukar ang iyang pagkakonsentedor pinaagi sa pagpangutana kun unsay sala nga iyang nahimo sa pagkuha sa pula nga bag nga didto sa sulod sa sakyanan sa iyang badlongong sinagop.

Unsa man diay sulod niadtong bag? Nganong gidalidali man pagkuha sa mayor? Kay kun wala untay gikahadlokan si Fernandez, dili siya magdalidali og kuha aron tagoan ang pula nga bag.

Ang dakong hagit kang Mayor Fernandez kinsa giila nga dakong lider sa Catholic Faith Defender mao ang pagsulti sa tinuod unsay sulod sa maong bag. Walay angay mosabwag si Mayor Fernandez sa mga pulong sa Diyos nga mismo siya wala magpuyo sa iyang gisabwag nga pagtulon-an.