EDITORYAL - Panag-ilog sa posisyon

Ang anak nilang anhing Pres. Corazon Cojuangco Aquino ug Sen. Benigno Aquino Jr. nga si President-elect Benigno Simeon “Noynoy” Aquino III manumpa na isip ika-15 nga presidente sa Republika sa Pilipinas, hulip sa anak ni anhing Pres. Diosdado Macapagal nga si Pres. Gloria Macapagal-Arroyo.

Apan kawhaan (20) pa lang ka adlaw sa dili pa ang Hunyo 30, gubot na kaayo ang kampo ni Noynoy Aquino. Ang iyang mga campaign volunteers gikan sa nagkadaiyang “faction” nag-inilogay na kinsay matudlo sa nagkalainlaing departamento sa cabinet portfolio unya ni Aquino.

Kun kahinumduman, ang kampo ni Aquino nabahin sa duha ka “major groups” – ang Waray group diin nahisakop ang Kamag-anak Inc. pinanguluhan sa uyoan ni Aquino nga si Jose “Peping” Cojuangco ug ang ikaduha mao ang Balay group diin mahisakop si Sen. Manuel “Mar” Roxas III ug ang mga personalidad sa Hyatt 10 sama ni Dinky Soliman.

Naglabad karon ang ulo ni Aquino unsaon niya sa pag-accommodate ang liboan niya ka campaign volunteers gikan sa nagkadaiyang factions aron mo-fill up sa 25 ka mga posisyon sa iyang kabinete.

Ug ang mga kritiko ni Aquino kanunay’ng nagpahimangno kaniya sa pagtudlo og kuwalipikadong mga tawo sa tukmang posisyon, ug likayan ang pagtudlo og mga tawong nanimaho nang yuta. Hinuon, sa balita sa usa ka broadsheet, si Aquino nagkanayon nga nangita siya og mga batan-ong adunay idealismo kang kansang personalidad adunay pagka-visionary ug pagka-technocrat.

Mga 15.2 milyones ka mga Pilipino ang mituo sa kapabilidad ni Aquino nga modumala sa renda sa pangagamhanan. Tipik niining maong gidaghanon nga mibotar kaniya niadtong Mayo 10 mao ang mga pobre nga naglaum nga ang iyang “Walang corrupt, walang mahirap” dili kutob lamang sa political propaganda, kun dili hatagan niya og katumanan.

Dakong hagit kang Aquino ang paglikay nga magawungan ang iyang desisyon sa iyang pamilya, mga uyoan, igsuon, klasmeyt, mga higala, nanga-utangan og kabubut-on niadtong eleksiyon, ug mga interesadong grupo nga nakapalibot kaniya. Apan kun tuyo niyang magmalampuson sa iyang pamunoan, sugdan na niya og paghimulag ang iyang mga desisyon gikan sa impluwensiya sa maong mga tawo.