EDITORYAL - Joavan angay na i-rehab

Kanus-a pa kaha ipa-rehab ni Mayor Socrates Fernandez ang iyang sinagop nga si Joavan?

Mao kini ang pangutana sa mga tawo nga nasayod sa panghitabo sa dakbayan sa Talisay nga naglambigit sa konsentidor nga mayor ug badlongong sinagop.

Mismo si Mayor Fernandez nasayod nga walay laing sulbad aron maundang na ang pagpabadlong sa iyang sinagop kun dili mao ang pagdala kang Joavan ngadto sa rehabilitation center.

Ang Simbahang Katoliko Romano, pinaagi ni Msgr. Esteban Binghay, mitingog na pagtambag sa mayor sa Talisay nga iladong Catholic Faith Defender. Si Binghay mitambag kang Fernandez sa pagpa-ubos kang Joavan og counseling pinaagi sa psychologist sa Artsidyosesis sa Sugbo nga si Padre Loreto Jaque.

Apan hangtod karon wala kita makadungog kang Fernandez pagsagop sa tambag sa mga pari.

Milutaw gihapon ang iyang amahanong gugma – gugma nga kuwestiyonable tungod kay miabot na sa punto nga mikonsente kini sa mga dautang binuhatan sa iyang sinagop nga si Joavan.

Isip mayor, giisip si Fernandez nga tigpatuman sa balaod diha sa Talisay. Apan unsaon niya sa pagpatuman sa balaod kun mismo ang iyang sinagop dakong malapason sa balaod?

Masabtan lamang sa katawhan kun si Fernandez moabag kang Joavan pinaagi sa pagkuot gikan sa kaugalingon niyang bulsa aron mapiyansahan ang badlongong sinagop.

Apan kinahanglang manubag siya sa iyang gihimong pag-interbener pinaagi sa pag-abli sa Isuzu Bighorn nga gimaneho sa iyang sinagop aron pagkuha sa usa ka pula nga bag nga usa unta sa mga ebidensiya batok kang Joavan (tungod sa pagtuo sa kapolisan nga may sulod kadto nga drugas).

Kini tungod kay ang iyang gibuhat dili buhat sa usa ka mayor nga nagtuman ug nagpatuman sa balaod, kun dili buhat sa usa ka amahan nga konsentedor ngadto sa badlongon niyang sinagop!