PASG angay abolison

Usa ka ahensiya sa gobiyerno nga angayang abolison inig lingkod ni president-apparent Noynoy Aquino sa udto sa Hunyo 30 mao ang Presidential Anti-Smuggling Group (PASG).

Ang PASG gitukod ni Pres. Gloria Arroyo aron moabag sa Bureau of Customs paggukod sa mga smugglers.

Apan taud-taod na nga wala makatuman sa mandato ang PASG.

Nalambigit hinuon ang PASG og daghang mga isyu. Usa na niini mao ang pagpangilkil sa mga lehitimong mga importer.

Sa taudtaod na nilang tuyok-tuyok sa mga adwana sa nasud, wala na gyud silay tarong nga gihimo gawas sa pagpang-harass og mga importer, broker ug mga trucker.

Ang kataw-anan ning higayona nga wala na silay laing lingaw, nang-ronda na lang sila sa squatter area sa Payatas ug nanakop og pamilyahan nga nanghimo og mga peke nga shampoo nga ipamaligya sa kamerkadohan sa Manila.

Pinanguluhan sa officer-in-charge sa PASG nga si Danilo Mangila, gironda nila ang Payatas human makadawat og tip nga adunay nanghimo og peke nga shampoo sa lugar ginamit ang mga kabus nga mga pamilya sa lugar.

Pagsugod nako og basa sa balita sa Philippine Star, nagtuo ko og dako kaayong buhatanan og peke nga shampoo ang gironda sa PASG, apan sumala sa balita 229 ra diay ka shampoo bottles sa Clear, Sunsilk, Palmolive, Head and Shoulders, Pantene ug Rejoice ang nasakmit sa raiding team sa PASG.

Tiaw mo na, midaginot na lang ang PASG og ingon niining operasyon!

Hain naman diay ang maayong laki nila nga mga opisyal?

Ang PASG giisip lamang sa mga importer, broker ug trucker nga samok-samok sa customs, ug nagdugang lamang kini og palas-onon sa mga customs stakeholders tungod kay matag semana nangayo ang mga opisyal niini og “allowance” ngadto kanila.

Dinhi sa Port of Cebu, ang PASG gipadagan og mga sakop sa kasundalohan nga walay kabangkaagan sa balaod sa customs.

Niadtong si Director Ariel Palcuto pa ang regional director sa PASG-7, hilabihan kadaghan sa ilang gipangdakop nga mga kontrabando, gironda usab nila ang showroom sa BMW ug Mercedez Benz sa siyudad sa Sugbo tungod sa pagtuo nga wala kini makabayad og saktong import duties sa pag-import nila sa ilang gipamaligyang mga sakyanan.

Apan sa dihang napuli ang mga sundalo tungod sa mando sa kanhi nila PASG undersecretary nga si Atonio “Bebot” Villar, wala na gyuy tarong performance ang PASG-7.

Dili lang kay ang PASG-7 kun dili ang kinatibuk-ang PASG wala na gyuy tarong nga performance, busa angay silang abolison sa sunod nga pamunoan.

* * *

Ang nahitabo sa negosyanteng si Jonathan “Atan” Guardo nga nakatulog gyud og usa ka gabii sa National Bureau of Investigation (NBI-7) nagpakita og “bad side” sa allowance nga gipanghatag sa Cebu City Hall ngadto sa mga huwes nga nadestino sa dakbayan.

Si Guardo gidakop tungod sa kasong malversation of public funds nga gisang-at sa Philippine Sports Commission (PSC) gumikan sa wala ma-account nga pundo sa ASEAN Games dinhi sa Cebu dugay nang katuigan ang nakalabay.

Apan ang mga sakop sa NBI-7 midakop kang Guardo samtang nag-tennis sa Alta Vista sa Pardo niana g nang pagka-hapon niadtong Huwebes.

Ang katingalahan, lima ka mga huwes ang gitawgan sa staff ni Guardo aron makabutang sila sa P40 mil nga piyansa nga gipangayo sa Regional Trial Court sa Manila, apan pulos sila namalibad nga silay mo-isyu og release order ni Guardo.

Gitawgan usab sa staff ni Guardo si RTC Executive Judge Meinrado Paredes, apan gipasa sila sa acting clerk of court nga si Atty. Allen Davide (ig-unsa kaha kini ni kanhi Konsehal Junjun Davide?). Apan si Atty. Davide mipasa og balik ngadto ni Paredes kay matud niini nga makahimo si Paredes pag-isyu og provisional receipt sa piyansa ni Guardo. Apan si Atty. Davide miingon sa staff ni Guardo nga kay lawom nang gabii, dili gihapon ma-process ang release order.

Nakatulog gyud si Guardo sa NBI-7.

Mao na ba kini ang resulta sa allowance nga tag P40 mil nga gipanghatag sa Cebu City Hall ngadto sa mga huwes?

Nasayod man ang mga huwes nga si Guardo maoy higpit nga kaatbang sa politika ni Tomas.

Nahadlok tingale sila nga kun kinsa kanila ang mo-isyu og release order kang Guardo basin unya og buybuyon sila sa mayor nga karon congressman-elect sa south district.

Sa kadako sa maong allowance, walay huwes nga mobangga sa city hall.

Pananglitan adunay kontraktor nga gustong mokiha batok sa Cebu City Hall, dili kaha matotyo iyang kaso kay ang huwes nga mogunit niini nagdawat og dakong allowance sa City Hall?

Nakasabot na ko nganong hangtod karon, si RTC Judge Gabriel Ingles wala gyud modawat sa allowance nga gipanghatag sa Cebu City Hall, bisan unsa pa ka dako niini.

Midayeg lang ko ni Judge Soliver Peras tungod kay mao kini ang mi-ako pag-isyu og release order kang Guardo.

Kun nahinumdom kamo, si Judge Peras usab ang miluwat og desisyon nga nagkanayong dili mahimong sirad-an ni Tomas ang Cebu South Coastal Road tungod kay usa kini ka national road.

* * *

Angay tinud-on sa kapolisan si Mayor Socrates Fernandez pagpasaka og kasong obstruction of justice tungod sa pag-abli sa Isuzu Bighorn nga gidaladala sa iyang sinagop nga si Joavan sa dihang nanion didto sa Bulacao, ug mikuha sa bag nga pula.

Wala kita masayod unsay sulod sa maong bag nga pula.

Maayo lang unta og make-up ni Joavan ang sulod sa maong bag kay okay ra. Apan pananglit og mga shabu ang sulod sa maong bag?

Nasayod na ra ba ang publiko nga si Joavan usa ka adik-adik, apan tungod sa pagka-konsentidor ni Brod Soc, wala gyud kini mapa-rehab.