Ugmang adlawa mahinungdanon kaayo sanglit ang kinatibuk-ang katawhang Pilipinhon ang mohimo og usa ka balaanong akto sa pagpili sa ilang mga kandidato. Ang mga kandidato mohimo usab sa usa ka kulbahinam nga pagpaabot kun ugaling nagmatinud-anon ba ang ilang mga kaalyado sa mga pasalig niini nga sila iboto. Inigkahuman sa piniliay ang mga kandidato usab ang gipaabot nga unta mamahimong matinud-anon usab sa ilang mga panaad ngadto sa haring lungsod. Mahitabo lamang kining tanang butang maayo kun diha sa pagpili ug diha sa pagdaog anaa ang elemento sa gugma dili lang sa kaugalingon kondili sa kinatibuk-an sa kinabag-an. Ang tawong mahigugmaon mao kadtong mga tawong magkinabuhi diha sa kamatinud-anon ug kalumo. Mga kandidatong magsulti lamang sa mga alternatiba aron molambo ang katawhan, mga tawong kang kansang kinabuhi ang gihulagway diha sa mahigugmaong pakiglambigit sa mga tawo sugod mismo sa kaugalingong banay.
Mao nga mahinungdanong giya alang kanato diha sa pagboto:
1. Ayaw iboto ang mga tawong pataka lang og panghilabot aron ingnong mga bayani sa modernong panahon, mga tawong kutob lang sa mga balak-balak daw plakang buak.
2. Ayaw iboto ang mga tawong mosimba lang kun panahon sa kampanya ug sa piniliay aron makita sa kadaghanan.
3. Mga tawong nagpunay lang og pangdaot sa laing habig apan walay tinong plataporma de gobiyerno.
4. Mga tawong kansang mga diskurso napuno lang sa binastos ug mga hilas nga pasiaw apan walay unod nga pulong-ulong.
5. Mga re-electionists nga mapuslan lang kun piyesta ug imbitasyon.
6. Mga tawong maayo lang sa panaway apan walay konkretong pagtubag sa mga konkretong suliran sa haring lungsod.
7. Mga tawong nahimong manggihatagon panahon lamang sa kampanya ug piniliay, apan mga tawong nagpaburot ug hakog kun sila na ang makalingkod.
Kun duna kay paghigugma sa Dios ug sa yutawhan palihog sa pagboto ginamit ang imong utok.