Guardo ug Tommy

Gipilde g’yod ni magpapatigayon Jonathan Guardo si Mayor Tomas Osmeña sa pag-ehersisyo nila didto sa Cebu City Sports Center kaniadtong miaging hapon.

Samtang nakahuman g’yod og upat ka kilometro nga paglakaw si Mayor Osmeña, apan pito ka kilometro ang gidagan ni Guardo. Ang usa ka tuyok sa Sports Complex katumbas og 400 metros.

Nalipay si Guardo nga nakakita ni Tommy nga nag-ehersisyo kay matud niya gusto g’yod siya nga kadtong mga buot magpapili og katungdanan sa kagamhanan baskog og panglawas.

Matud ni Guardo nga concern kaayo siya sa maayong panglawas. Kini maoy rason nga kun siya mapili pagka kongresista, motabang siya aron mahatagan sa panginahanglan ang Cebu City Medical Center.

Bitaw, husto baya si Guardo nga wala kaayo maatiman sa dakbayan ang CCMC. Basi sa plantilya, ang CCMC dunay 700 ka kawani apan pagka karon kapin lang sa 500 ang gibutang.

Mao kini ang rason nga kuwang og kawani ang maong tambalanan nga makaatiman sa mga pasyente. Sayonan ka nga duna pa may mo-leave sa trabaho ug mo-absent mao nga kuwang g’yod ang kawani.

Unya ang budget usab nga gitagana alang sa mga tambal kuwang. Samtang P139 milyones ang budget sa CCMC, apan ang subra sa P100 ka milyon niini gigamit ra sa sweldo ug allowances sa mga kawani.

Gawas ana, ang nahabilin ibanan pa g’yod og bayad sa kuryente, telepono ug ubang gastohanan mao nga P14 milyones na lang ang gitagana alang sa drugs and medicines. Dili ba kuwang kaayo?

Tinuod ang CCMC makakwarta usab og gamay gikan sa koleksyon nila, apan ang tinuig nga kita nga moabot og dul-an sa P40 milyones, giapil na kini sa P139 milyones nga budget.

Sa laktud, kuwang g’yod sa pag-atiman ang atong ospital sa dakbayan. Giuktaba ni Guardo ang pagbisita niya sa CCMC. Inay kaniadtong Huwebes, mora’g idayon kuno niya karon nang Lunes. Atong paabuton kun unsay iyang mga sugyot.

Kun ako hinoon ang pangutan-on, ilisan nako ang nagdumala sa CCMC. Maayo man unta kining mga tawo nga bisan og dili makighinabi og media, apan motrabaho g’yod og maayo.

Apan tan-awa ra god og unsay sitwasyon sa CCMC. Unya, kay daghan man ang kakuwangan sa ospital, duna ba siya’y rekomendasyon ngadto sa mayor nga wala aprobahi? Bi, pakit-a kuno ko Dr. Myrna Go.

Ang wala nako magustohi aning Dr. Go kay “lihay pa sa langgam manatad” kun imong interviewhon.

* * *

Naminaw ko sa mga report ug nahibaw-an nako nga nagkainit na g’yod pag-ayo ang eleksyon diha sa Mandaue.

Ang nagsangka g’yod diha pagka mayor mao ra sila si reelectionist Jonas Cortes ug si Kongresista Nerissa Soon-Ruiz.

Ang nadunggan nako mga report nga sa tulo ka tuig nga paglingkod ni Jonas isip mayor wala kuno’y maayong mga proyekto nga namugna. Kun mao kini dili siya angay’ng papadayonon.

Dunay report nga mikunhod kuno ang support ngadto ni Ruiz human siya mitakli sa iyang suporta ngadto ni presidential aspirant Manny Villar gikan ni presidential candidate Gilbert Teodoro.

Apan kun ako ang pahukmon, ang pagdumala sa usa ka local government unit, dili maayong ibasi nato kun hain misuporta ang usa ka tawo.

Bag-o pa ko sa media kaniadto nga si Soon-Ruiz nagsugod sa public service mao nga natan-aw nako nga eksperto na kaayo siya pagdumala sa kagamhanan.

Nalantaw nako nga moasenso tingali ang Mandaue ubos sa iyang pagdumala kay gawas nga siya doktor, taas na siya og kinaadman pagpadagan sa kagamhanan.