Sama sa gipaabot sa kadaghanan “general denial” ug politika maoy gipasanginlan ni Senador Manny Villar nga nagpaluyo sa mga pasangil batok niya.
Gikan sa gibulgar sa iyang kanhi abogado nga si Atty. Restituto Mendoza giunsa niya pagpangilad aron makab-ot ang tanang kabtangan nga iyang gihuptan ngadto sa gibulgar nilang Senate President Juan Ponce Enrile giunsa paggamit ni Villar ang iyang impluwensiya isip kanhi pangulo sa Senado aron lugpitan ang Philippine Stock Exchange, pulos taphaw ang mga nahimong tubag ni Villar.
Politika dayon, sama sa kasagarang lansis, maoy gigamit ni Villar nga pasangil inay nga tubagon ang seryosong mga pasangil matag punto.
Sama sa giingon ni Enrile mamahimong makiglalis si Villar nga wala siyay nahimong kalapasan sa pagpaburot sa iyang kabtangan gamit ang PSE niadtong 2007.
Apan unsaon man niya pagpasabot ang iyang pagtambong atol sa deliberasyon sa PSE nga nagtuki maylabot sa iyang kompaniya ang Vista Land and Lifescapes Incorporated.
Ang iyang presensiya atol sa board meeting sa PSE igo na nga makahatag og pressure sa maong ahensiya sanglit siya maoy presidente sa Senador niadtong higayona.
Matud ni Villar nga nitambong siya aron ipasabot ngadto sa PSE board nganong angayang tugotan ang iyang kompaniya nga itanyag ang shares niini alang sa public investors.
Ang pangutana nganong kinahanglang siya maoy mangunay paghimo niini kun dili pa paggamit sa iyang gahom ug impluwensiya maoy iyang tumong? Kun wala niya lugpiti ang PSE nganong diha-diha gitugotan sa PSE board nga i-release ang shares sa vista land gikan sa escrow.
Usa pa dili ba ang presidente sa Senado kinahanglang mo-divest sa iyang mga business interest? Nganong bisan si Villar naglingkod na isip pangulo sa Senado nagpabilin man gihapon siyang nanag-iya og dagkong mga negosyo?
Ang nakadaot kay direkta pa nga nakigtransaksiyon sa mga ahensiya sa gobiyerno. Dili ba ni tataw nga conflict of interest?
Kun niadtong presidente pa lang siya sa Senado labihan na nga nakapahimulos ni Villar sa iyang gahom aron makabintaha ang iyang mga negosyo unsa naman kaha kun siya mamahimong presidente sa nasud?
Dili kaha nga ang iyang paggasto og dakong kantidad sa salapi karon sa kampaniya kabahin ni sa iyang gilantaw nga investment aron maangkon ang pwesto pagkapresidente aron unya wala nay babag niya pagkab-ot sa tanang negosyo nga buot niyang sudlan?
Ang akong kabalaka mao nga basin og si Villar mamahimong presidente dili lang ang iyang mga stocks sa iyang kompaniya maoy iyang ibaligya. Ang kuyaw og ang tibuok nasud iyang i-negosyo.
* * *