Palpak na halalan?

Kung sakali’t bigo ang ating halalan

Lalo pang gugulo itong ating bayan;

Mga pagbabagong nais na makamtan

Ay muling naglaho at tayo’y nilisan!

Hindi ba’t ang hangad pinakamimithi

Nitong sambayanan tayo ay pumili –

Mga bagong lider na sa baya’y tangi

Pero ang nangyari lahat tayo’y sawi!

Sa poll automation tayo ay umasa

Eleks’yon sa bansa’y magiging maganda;

Pagkatapos nito tayo ay umasa

Na magtatagumpay ang bagong sistema!

“Failure of Election” hindi natin hangad

Pero ngayo’y waring ito’y magaganap;

Dahil kapos yata ang magandang hangad –

Ng ating Comelec na sabi’y matapat!

Unang dapat gawin ay hindi nagawa

Ang mga botohan ay hindi pa handa;

Hindi pa kumpleto ang mga balota

Halalan sa Mayo ay bigo nga yata!

Kung bigo ang ating automated voting

Walang mangyayari sa ating hangarin;

Mga kandidatong humarap sa atin

Namili man tayo ay bale-wala rin!

Sayang ang panahon at perang naubos

Ng mga candidate na tapat ang loob

Kanilang hangaring sa baya’y maglingkod

Lumipad sa hangin at naglahong usok!

Dahil sila’y bigo ang baya’y bigo rin

Na tayo’y lumanghap ng sariwang hangin;

Ang dati ring simoy ating lalanghapin

Kaya ano kaya ating sasapitin?!

Sa nangyaring ito’y ating makakamit

Ay ibayong dusa at mga hinagpis;

Mga daing nati’y ipukol sa langit

Hilinging maglider – Diyos ng pag-ibig!