Daghan karong mga politiko ang nagbalhin-balhin og partido. Pipila kanila personal ang rason o ba kaha pinasubay sa kasabutan sa ilang mga kapartido.
Usa ray bug-at nga hinungdan niini, kini mao ang madawat nga pundo gikan sa ilang national parties. Duna may pipila ka partidong nalangay sa ilang paghatag sa ilang pundo hinungdan nga ang lokal nilang mga kandidato mibalhin og laing partido nga ‘galante’ ug naka-release og sayo og pundo alang sa kampanya.
Ingon na niini ang nahitabo karon sa mga politiko sa atong nasud. Mga tawong atong gisaligan sa atong botos aron maoy modumala kanato ug gipaabot natong makatabang sa atong kahimtang karon.
Ang usa ka politikong dili makaakong mobali sa ubang kampo, nagpakita kini sa iyang pagkamatinud-anon. Dili lang sa iyang partido kundili lakip na sa mga tawong naghangad kaniya ug labaw sa tanan sa iyang kaugalingon.
Mao ni ang mga politikong may lig-ong baruganan ug angayang panaminan sa uban tungod kay bisan sa kahagip-ot sa ilang pundo sa kampanya nagpabilin silang kasaligan sa ilang mga kauban.