EDITORYAL - Dili maayo mag-apil-apil

Dili angay ikasuko ni Mayor Tomas Osmeña ang pag-angkon ni Bise Mayor Michael Rama nga adunay pipila sa mga kawani sa Cebu City Hall nga mitabang sa pagpangampanya alang sa mga kandidato sa Bando Osmeña Pundok Kauswagan (BOK) kun kini tinuod nga nahitabo.

Usa ka dakong kalapasan sa balaod sa eleksiyon ang gihimo ni Osmeña kun sa iyang pagpangampanya migamit siya og mga kawani sa Cebu City Hall.

Ang mga kawani nga nagpagamit manubag usab bisan sa ilang employment status, tungod kay ang kawani ug opisyal sa gobyerno dili angay mag-apil-apil sa politika.

Gi-expose sa oposisyon ang kontrobersiya. Apan maayong dili lang kutob sa pagpublikar sa maong isyu ang himuon sa Comelec.

Mas makatabang sila alang sa hapsay ug makiangayong eleksiyon kun mopasaka sila og kaso batok sa mga kandidato sa BOPK ug sa mga kawani mismo.

Kun mapasakaan og kaso ang maong mga kawani, mahimo silang ehemplo sa ubang mga kawani sa gobyerno ug maka-amgo nga dili diay mahimong mag-apil-apil sa politika ang mga public servant.