Nato, Eming at Navarro ng Maynila

MUKHANG nalilinlang nina Nato ang financer ng jueteng, Eming, ang may hawak ng EZ2 at 137 sa tinatawag na masagana dyan sa Quiapo at si Navarro, ang miembro ng Manila’s bugok police force ang sinasabing batang sarado at kolektor ni General Rudy at Boysie ng National Capital Regional Police Office.

Ito ang pinagkakalat ni Navarro sa kanyang mga kausap na iligalista sa Maynila kaya naman ang mga kamoteng kumakausap sa kanya kahit na nag-iiyakan ay walang magawa kundi ang sumunod sa gusto niya. Sabi nga, bigay pera!

Simple lang ang palabas ni Ver ‘nabaho’ sa kanyang mga tinata­guan at binubukalang mga parokyano hindi na siya naka-destino sa MPD porke inilipat siya sa NCRPO kaya nasa kangkungan division na siya ng katulisan.

Maganda ang gimik ni Ver ‘nabaho’ sa mga tanga pero hindi niya puedeng maguyo ang mga asset ng mga kuwago ng ORA MISMO, porke bawat hakbang nito ay basang-basa ng huli.

Ayon sa mga asset ng mga kuwago ng ORA MISMO, mukhang may malaking problema sina Eming at Ver ‘nabaho’ kay Apeng see, ang karera bookies king, na nakalungga dyan sa may tambakan alley.

Inginunguso kasi ng dalawang kamote si Apeng see na grabe ang koleksyon sa bookies niya at kung bigyan si Ver ‘ nabaho’ ay barya-barya lang.

Payo ng mga kuwago ng ORA MISMO, kina Eming, Ver ‘nabaho’ at Apeng see mas maganda sigurong magpatayan na lang kayo. Hehehe!

Samantala, sina Tisay, ang umaalagwang reyna ng EZ2 at loteng sa Maynila, Boy abang, hari ng horse racing bookies ang mortal enemy ni Apeng see.

Lucy, Renel at Anita

ANG tatlong kamoteng ito ang humahawak ng tinaguriang sugal lupa sa Caloocan at Quezon City.

Lucy, ang may hawak ng saklang patay sa Caloocan kaya naman pala maraming nakaburol dito dahil ginagamit sa ‘monkey’ business ng una.

Si Anita, ang taga-bitbit ng intelihensiya sa mga bugok na pulis.

Ika nga, lagum!

Si Renel, ang may hawak ng video karera sa Quezon City kaya ang mga bata dito ay nagugumong sa masamang bisyo dulot ng pasugal ng kamote.

Si Buboy Go, naman ang may hawak ng video karera sa Malabon at Valenzuela hindi puedeng patigilan ang kamoteng ito dahil ang mga yor-me ang pinagyayabang niya na super lakas siya sa mga ito.

Totoo kaya ito?

Abangan.

Si Luding at si Mayor sa La Union

MAGKATABI pala ang resthouse ni Luding ang kingpin ng jueteng  sa Baguio at La Union dahil sa bahay ng una nakatira ang kanyang mga empleado sa dayaan bolahan.

Kaya pala hindi ito sinisita ni Mayor dahil ang lupang nabili ni Luding ay si yor-me ang owner kaya malaya itong nakakapagnegosyo ng 137 sa area.

Ayon sa mga asset ng mga kuwago ng ORA MISMO, umaabot sa P2 million araw-araw ang kubransa ni Luding sa buong La Union puera pa rito ang kubransa sa Baguio.

Sinabi ng mga asset ng mga kuwago ng ORA MISMO, malayang nakakapangubra ang mga kubrador ni Luding sa La Union at Baguio dahil election ngayon kasi kailangan ng mga kamoteng pulitiko ang funding sa kampana este mali kampanya pala.

Kaya naman tuwang-tuwa si Luding sa kanyang mga teritoryo dahil walang huhuli sa kanya porke malaki ang itinatapon niyang salapi sa kampanya ng mga left and right na pulitikong kanyang sinusuportahan.

Sa Occidental Mindoro, patuloy ang dayaan bolahan ni Rolly Diaz todits porke sagana daw ang mga lespu sa intelihensiya kanyang ibinibigay kaya naman grabe na umano ang house nito sa ngayon.

Si Aging ng Olongapo ang siyang hari ng STL bookies dito pinapayagan din siya ng mga lespu dahil sa intelihensiyang ibinibigay niya sa mga bugok.

Malaki din ang campaign fund na ibinibigay niya sa mga kumakan­didato ngayon sa Ulo ng Apo para malaya ang kanyang operasyon ‘SUGALAN BLUES”.

Si Salud ng San Juan Batangas at Totoy Jaruta ng Alaminos Laguna ay naiirita na daw sa mga pulitikong hingi ng hingi ng pera sa kanila dahil ang kakapal daw ng mga mukha ng mga kumakandidato sa kani-kanilang lugar na pirmi silang kinakalampag dahil sa funding.

Abangan.