Non-stop corruption!

Sa usa ka TV interview uban kang kanhi Speaker of the House, Joe de Venecia, usa sa mga pangutana nga gipangutana kaniya, mao nga aduna bay kahigayonan nga magkauli sila si DeVenecia ug Presidente Arroyo sa maayong kabubut-on. Ang tubag ni De Venecia: Imposible ang reconciliation tali kaniya ug sa Presidente.

Matud niya : “No one wishes more than I do to see our political leaders coexisting in harmony. But, of course, reconciliation must be founded on some moral principle: On truth, justice and mutual openness. And I still see none of these virtues in the President and in this administration. So how can we think of reconciliation?” Sa ato pa, imposible na gyud kaayo alang kang De Venecia ang reconciliation uban sa Presidente.

Ug usa sa mga dagkung isyo nga gibasihan ni De Venecia ngano nga dili siya makig-reconcile uban sa Presidente, mao ang iyang giingon nga non-stop corruption sa atong nasud karon.

“Look at what’s going on around us even now. Corruption – both wholesale and retail – continues non-stop. Our country has fallen to the very bottom of the World Bank’s list of 10 East Asian states ranked according to their degree of corruption.” Sa ato pa, walay puas ang korupsyon sa atong nasud. No let-up. Ug kini, ginagmay ug dinagko. Wholesale o retail. Sa ato nang gibalikbalik dinhi, atong gipalagpot si Presidente Marcos gumikan sa korupsiyon – apan atong gibilin ug gipalambo ang korupsyon.

Matud pa usab ni De Venecia, nagpadayon ug nagkadaku ang suliran sa ekonomiya sa nasud. Ang katawhan gipanggutom, ug sulod sa unom ka tuig nga pamunoan ni Presidente Arroyo, na-pilo kaupat ang gidaghanon sa mga Pinoy nga gigutom. Quadrupled.

Ingon man, nagkadaghan ang mga kabus nga Pinoy. Mi-usbaw ang gidaghanon sa mga pobreng Pinoy, gikan sa 30 porsyento sa tuig 2003, ngadto sa 33% sa tuig 2009. Unsa man kono kining giingon sa present administration nga miusbaw na ang ekonomiya sa nasud? .

Gumikan niini, ug uban pang mga hinungdan, dili makatugot ang konsiyensya ni De Venecia nga makig-reconcile pa siya uban ni Presidente Arroyo. Ug kini, kun maghisgot tang De Venecia, ato kini siyang ma-associate ni Presidente Ramos. Sa ato pa, kun unsa man ang ipanulti ni De Venecia, makaingon ba kita nga mao usab kini ang hunahuna ug baruganan ni Presidente Ramos?

Ug usa sa mga gitinguha karon nila ni Ramos ug De Venecia, nga ilang mabawi ang ilang Lakas-CMD gikan sa KAMPI. Kining maong kaugmaran naghulagway nga dili na magkauli sa maayong relasyon ang pundok ni Presidente Ramos ug ang present administration. Sa mga tambay pa: ”let us to wait and see!”