EDITORYAL - Patas nga tulobagon

Si Bokal Juan Bolo, sa katapusan, mitiyabaw na sa pagduot lamang sa iyang kaugalingon ug sa mga sakop sa Cebu Provincial Awards Committee (CPAC) sa kontrobersiyal nga pagpalit sa Balili property sa Tinaan, dakbayan sa Naga.

Kang Bolo pa, nganong siya lang ang giduot? Nga sa kinatibuk-an, ang transaksiyon tali sa Kapitolyo ug sa pamilyang Balili nasugdan ug natiwas pinaagi man sa mando ni Gob. Gwendolyn Garcia?

Dugang pa niya, ang Hunta Probinsiyal, lakip na ang presiding officer niini nga si Bise Gob. Gregorio Sanchez mitugot man sa transaksiyon.

Busa sa mata sa katawhan, silang tanan ang nakabenepisyo kun adunay panguwarta nga nahitabo – kana kun aduna man ugaling!

Usa mata sa balaod, kay ang gobernadora ang mipirma sa memorandum of agreement nga nakapasar sa pagtuon sa Hunta Probinsiyal gikan sa CPAC, salikwaot paminawon nga ang usa lamang ka sakop sa Hunta Probinsiyal ang iduot.

Patas nga silot sa patas nga tulobagon ang angay kanila.