Ang telebisyon nahimong paborito nga medium sa mga politiko pagpaila sa ilang kaugalingon ngadto sa kinabag-an nga mga botante sa nasud.
Apan na-obserbahan sa kadaghanan nga adunay ubay-ubay nga mga propaganda sa mga kandidato sa Mayo 10, 2010 nga eleksiyon, ilabi na sa mga nasyonal nga kandidato, wala magsulti sa tinuod ug wala magsabwag unsay iyang plataporma de gobyerno.
Usa ka paagi sa pagpangilad sa mga botante ang pagpagawas og TV ads nga adunay mga pagangkong bakak – bakak nga gitumong aron makakuha og simpatiya sa mga botante, ilabi na sa mga kabus ug “undereducated.”
Kun ang usa ka kandidato seryoso sa iyang pagpapili, isabwag niya ang matuod -– matuod niyang nakit-ang mga isyu sa atong nasud, ang matuod niyang sentimento sa mga isyu, ug ang matuod niyang plataporma unsaon pag-usab kining gobyerno nato karon nga gihugpaan og mga dautan.
Busa kitang mga botante na lamang ang motimbangtimbang kinsa sa mga kandidato nga grabeng nakapamakak ug nakapangilad kanato diha sa ilang TV ads. Kining mga kandidatoha dili angay hatagan sa atong mga botos. Ni John Rey Saavedra