Ang San Pedro ay maganda
ito’y bayang pinagpala,
Mga tao’y matiisin
tahimik at palasimba;
Pagka’t ito’y unang bayan
sa probinsiya ng Laguna
Kaya unang mararating
kung mula ka sa Maynila.
Ang San Pedro ay kinuha
sa ngalan ng Santong Banal
Na sa langit ay may susi
pagka’t doon tayo’y bawal;
Subali’t kung ang ‘yong puso
at ang diwa ay marangal –
Si San Pedro’y nakangiting
sa langit ka’y ipapasyal!
Ang San Pedro ay mabango –
simbango ng sampaguita
Gayundin ng Ilang-Ilang
ng champaca at ng camia;
Mga tao’y masigasig
na magtuhog sa kanila
Kaya dito ay may garlands
kung graduation at parade!
Ang San Pedro ay maginto –
mga gintong hugis itlog
Dahil manok ni San Pedro –
ay masipag na mangitlog;
Kaya dito ay sagana
sa itlog na penoy, balut -
Na nagtawid kahirapan
sa maraming ngayo’y bantog!
Ang San Pedro ay matatag
may anak na mababait,
Mga tao’y nagsisikap
na sila ay walang batik;
Umaangat itong bayan
pagka’t lahat nagsasakit –
Na tumuklas ng biyaya –
na gamit ang puso’t isip!