EDITORYAL - Angay'ng pasidunggan si Pacman

Wala’y kalapasan sa election code kun hatagan si Manny Pacquiao og hero’s welcome kon dakong pasidungog sa iyang pagpauli gikan sa dako niyang kadaugan didto sa Dallas, Texas.

Kini sumala ni Comelec Commissioner Gregorio Larrazabal.

Giawhag ni Larrazabal ang mga politiko nga dili supakon ang red carpet welcome alang kang Pacquiao kinsa modagan pagka-kongresista didto sa Sarangani unya sa Mayo 10.

Uyon kami sa baruganan sa Comelec kabahin sa pasidungog nga nagpaabot kang Pacquiao.

Mao ray atong mabawos kaniya kinsa nakahatag og dakong kadungganan sa nasud nga Pilipinhon sa tibuok kalibutan.

Angay lang nga pahalipayan sa mga Pinoy si Manny ug dili unta sagola’g politika kini.   Ni Juanito V. Jabat