Ang mga pinilian

Maihap na lang gyod ang nahabiling adlaw sa dili pa ang gikatakda nga piniliay dinhi sa nasud. Sa unang kolyada sa kampanya alang sa nasudnong posisyon napulo ka mga kandidato ang mipresentar sa ilang kaugalingon aron maoy modala sa renda sa atong kagamhanan apan karon siyam na lang tungod kay diskuwalipikado ang pambato sa partidong Kilusang Bagong Lipunan o KBL.

Gawas na sa presidential race si Vitaliano Acosta kinsa posibling mag atubang og kaso tungod sa pagpamakak sa iyang certificate of candidacy. Si Acosta dili diay rehistrado nga botante sukwahi sa iyang gibutang sa certificate of candidacy niini.

Sa mga gipahigayon nga survey kanunay nga nag una ang pambato sa pagka pangulo sa Partidong Liberal nga si Noynoy Aquino kinsa kanunay nga matupngan pero wa pa gyod malabwi sa pambato sa Partidong Nacionalista nga si Manny Villar. Naa sa ikatulong dapit ang pambato sa Puwersa nang Masang Pilipino nga si kanhi pangulo Erap Estrada nga gisundan usab ni Gibo Teodoro sa Partidong Lakas Kampi CMD ang partido sa administrasyong Arroyo.

Ang maong upat ka mga kandidato gisundan nila ni Senador Dick Gordon, JIL preacher Edie Villanueva, Senadora Jamby Madrigal, City Councilor JC Delos Reyes ug Environmentalist Nick Perlas.

Kinsa kaha nila ang atong pilion? Ang nag una sa survey o ang nangiwit? Sa imong pagpili maka influencia ba nimo ang resulta sa survey o baliwalaon lamang nimo kini! Bahala ka! Ang mahinungdanon nga miapil ka sa pagpili sa kandidato nga maoy imong gituhoan nga makausab sa dagan sa nasud sa Pilipinas bahala na kun ang imong mapili pinilian.

* * *

Si Noynoy ug Manny nagnilabayay na og lapok. Sa iyang mga political ads nga naghisgot og corruption klaro kaayo nga gipuntarya ni Noynoy si Manny tungod sa C-5 road. Mibawos usab ni Noynoy si Manny pinaagi sa iyang mga torotot diin gibulgar usab niini ang gipaburot nga prisyo sa yuta sa Hacienda Luisita nga gihimoan og dalan. Busa kun sa imong pagboto maoy imong basihanan ang dili kurakot. Hagbong na silang duha kay pulos man diay sila mga kurakot. Basin kaha hinoon og si Erap Estrada ang modaug. Hinumdomi ninyo nga gikonbikto man tood si Erap sa kasong corruption, pero dili salapi sa gobyerno ang iyang gikurakot kun dili salapi sa mga jueteng operators busa way nawagtang sa panudlanan sa kagamhanan. Di pariha ni Noynoy ug Manny nga salapi sa gobyerno ang ilang gihilabtan. Pastilan sa?