Anomaliya sa San Roque

Aron motoo ang mga tawo nga wala gyuy labot si San Roque (Ciudad) barangay captain Rogelio Ruizo ug ang ubang opisyal sa binuang nga giingong gihimo sa usa nila ka kawani sa barangay, angay nila kini nga suspensohon ug taktakon sa serbisyo.

Giingnan man gud ko ni Kapitan Ruizo nga ang responsable kuno sa binuang nga bisan ang mga patay, apil na sa kanhi nila kapitan sa barangay nga namatay niadto pang 2004, mao si Ligaya Britania, ang gitudlo niya nga Gender and Development (GAD) focal officer sa barangay.

Pastilan, dia ko’y mga dukomento nga nahuptan nga kadaghanan sa mga tawo kang kansang ngalan giapil sa giingong mitambong sa mga kalihukan sa barangay, mitataw nga wala sila masayod sa pag-apil sa ilang ngalan.

Labaw na tingali nga wala masayod nga giapil ang iyang ngalan sa lista mao si kanhi Kapitan Telesforo Rabaya, nga namatay kaniadto pang Marso 3, 2004. Paita aning Ligaya uy kun tinuod man nga siya ang naghimohimo sa maong dukomento.

Unsa, wala na gyud mo’y laing nahunahunaan nga paagi para makakuwarta? Awhagon nako si Ligaya nga motubag niining maong pasangil kaniya sa ilang kapitan, kana kun dili tinuod ang pasangil.

Unya, kamong ubang opisyal sa barangay San Roque kun wala moy labot, gawas ug tubaga kining maong isyu. Paita, kun tinuod man gani kining maong report, dili gyud maayo nga kamo sublian sa katungdanan.

Ang mga anak ni kanhi kapitan Rabaya nga giapil usab sa lista, ug uban pang mga molupyo sa barangay San Roque, misinta ug mipirma na og affidavit. Uy, tsk-tsk-tsk, kadakung uwaw ani uy.

Mao diay nga dihang si Konsehal Lidiore “Boy” Miranda nangayo og kopya sa “minutes” sa mga sesyon nga gihimo sa barangay San Roque dili mopahatag si Kapitan Ruizo kay duna man diay binuang.

Higala man gyud nako kini si Kapitan Ruizo, ako kang awhagon nga ayoha pagdumala ang imong barangay. Tan-aw nako mora’g magkaproblema ka gyud.

Unya, may dukomento usab ko nga nahuptan nga nanghuwam mo og kuwarta gikan sa Green Bank, unya ang mga nakautang nga kawani gisigehan og kolekta sa bayad, apan wala diay i-remit sa barangay treasurer.

Pastilan, Kapitan Ruizo, tan-awa kining pasangil batok sa imong treasurer nga si Gina Aniñon, kay kamo god maoy mipirma og kasabotan uban sa mga tagdumala sa banko.

Usa sa mireklamo nga gikolektahan siya og bayad sa iyang “loan” apan wala diay gi-remit sa treasurer didto sa banko mao si Mary Grace Mancao, kanhi SK chairperson sa San Roque ug nahimo usab nga clerk sa barangay.

Akong awhagon si Kapitan Ruizo nga tubagon og tagsa-tagsa kining mga isyu nga gibato kaniya sa iyang number-1 nga konsehal. Dili igo nga moingon ka lang nga gihimo kini ni Miranda kay nangambisyon nga mopuli kanimo sa puwesto.

Motoo ko nga dunay tinguha si Miranda nga modagan pagka kapitan, ilabi na nga suod kaayo sila ni Vice Mayor Michael Rama, apan bisan og unsay iyang plano, kun wala gyuy basihanan dili gayod siya makahimo’g pasangil.

Kun mamasangil siya unya dili tinuod, may katungod ang mga hingtungdan nga mopasaka og kaso. Mao kini ang prinsipyo sa demokrasya.

Tan-aw hinoon nako ani, panington gyud sila si Kapitan Ruizo sa pagpanubag sa mga isyu nga gibato ni Miranda. Daghan pa kaayong mga isyu nga wala pa nato mahisguti. May gitakda kami nga miting uban sa mga hingtungdan, apil na si Ligaya Britania.

Sagdi lang, pahibaw-on ko kamo unsay mga tubag nila ni Ruizo, Britania ug uban pang mga opisyal nga gipasanginlan nga nakahimo’g binuang sa barangay.