Bugti sa OFWs

Sa makausa pa, naluwas na sab sa overseas Filipino workers (OFWs) ang ekonomiya sa Pilipinas. P798 bilyones ang ilang napada sa ilang mga kapamilya sa tibuok tuig 2009. Sa kataposang ihap, niabot na og siyam ka milyon ka OFWs ang nanimpad sa nagkalainlaing kanasuran sa kalibotan.

Mas dako ang ilang natigom kon itandi sa P755 bilyones niadtong 2008. Kay mas taas ang kalidad sa ilang mga trabaho ug mas dagko ang ilang suholan kon itandi sa nangaging katuigan. Taas hinuon kaayo ang presyo nga gibayran sa nasud ug sa katawhan. Bugti sa dakong tampo sa OFWs, nahikawan ta sa pangalagad sa labing takos nga mga mananambal, inhinyero ug magtutudlo.

* * *

Angay’ng manlipaghong sa kauwaw ang mga pamunoan nilang Pres. Arroyo ug sa ubang mga pangu. Kay ang labing makahuloganon nga nabawos nila sa OFWs mao ang pag-ulug-ulog nga sila ang bag-ong mga bayani sa nasud. Nakapait kay wa pay usa sa mga nangambisyon nga mamahimong sunod nga presidente nga nakatakda og tukmang mga lakang unsaon pagtabang ang OFWs:

l Kutob ba lang sa pagplite nila pabalik kun daugdaugon sa langyaw’ng mga agawon?;

l Unsaon man pagpalig-on ang pagpanalipod sa OFWs bisan sa labing kuyawng trabahoanan?; o

l Unsaon pagmugna og makiangayong kahigayonan sa trabaho aron di na mapugos ang OFWs pagbiya sa ilang pamilya aron pagsungasong sa langyawng kabaybayonan?

* * *

Sa kasamtangan, angayng tutokan sa hingtungdan nga mga buhatan sa kagamhanan ang mosunod nga batakan nga mga suliran nga nahiagoman sa OFWs:

l Ang pag-usab-usab sa mga kontrata nga ilang gipirmahan nga mas gamay ra ang suholan ug benepisyo nga aktuwal nga nadawat kay sa gisaad nila, gawas nga lahi ra kaayo ang posisyon nga aktuwal nga nasudlan, gidawat isip inhinyero apan panday diay ang trabaho; ug

l Bisan sa mga nasud nga higpit nga gidili ang placement fees, gikolektahan ang mga aplikante og bisan unsa na lang nga bayranan nga gilain lang ang ngan, nga kinahanglan silang mangutang og dako una makalarga.

* * *

Laing dakong buslot sa pagbaratilyo sa OFWs ngadto sa nagkalainlaing kanasuran, nga sama sa naandan nataligam-an sa kagamhanan, mao ang pait nga mga implikasyon sa pagkabungkag sa mga pamilya. Kinsa man intawon ang moatiman sa mga bata kansang inahan ug amahan pulos OFWs?

Ang tubag sa kagamhanan? Gidapit ang OFWs ug ilang mga kapamilya kausa matag tuig aron hatagan og libreng pagkaon ug kahigayonan nga makaapil sa bola alang sa pipila ka premyo. Matag karon ug unya, ipaubos nila ang mga kapamilya sa OFWs og livelihood skills training sa way pagsusi haom ba sa ilang katakos o maggamit ba sa tinuod nga panginabuhi. Kon matsambahan, matanyagan sila og pahuwam nga kapahimuslan lang kon matuman ang makalilisang nga sapaw-sapaw nga mga panginahanglan.

* * *

Email:[email protected]