Dancing Inmates patamnon utanon

CEBU, Philippines - Gibalita nga si Gob. Gwen Garcia mipahibawo nga gusto niya nga ang mga inmate sa provincial jail mohatag og top priority pagtanom og mga utanon sud sa jail compound kay sa sayaw-sayaw.

* * *

OK ra man kuno ang Dancing Inmates apan mas OK para niya kun kining mga piniriso mananom og mga utanon nga ilang makaon. Duna man guy dakong bakanteng luna sud sa compound sa CPDRC nga maayong himoong vegetable garden.

* * *

Daghan ang nakasabot sa bag-ong polisiya sa gobernadora kalabot sa mga inmates kon piniriso diha sa CPDRC. OK ang pagsayaw-sayaw sa mga piniriso apan mas maayo kun kamao sad sila mananom sa utanon aron dili na mogasto pa ang probinsiya sa utanon nga ilang kan-on matag adlaw.

* * *

Apan dunay nakahisgot sa sis-brod relationship ni Ma'am Gwen ug Sir Byron nga maoy tigmugna sa Dancing Inmates. Ngano kunong sa kalit lang "mora'g wa na ganahi si Ma'am Gwen sa Dancing Inmates ni Sir Byron."

* * *

Di na lang ko modugang pa kay basin nya'g maakusahan ta'g intrigador. Kontra ra ba gyud na nako ang mga intrigador.

* * *

Sa laing bahin, nagpadayon ang pagpangita kang Sen. Ping Lacson. Naay mga report nga tua siya sa Hong Kong, sunod tua siya sa Australia, sunod tua siya sa Macau ug unya China. Di ba ang Macau naa man sa China? Mora mag nagduwa sila'g hide-and-seek -- si Ping ug ang nangita niya.

* * *

Tungod sa maayo niyang performance isip hepe sa Metrodiscom dinhi sa Sugbo, si Ping Lacson gihimong adopted son of Cebu City. Gani sa dihang ibalhin na siya sa laing assignment, ang mga opisyal sa siyudad mihangyo sa di lang i-transfer si Ping. Nakatabang ba kang Ping ang iyang pagka Cebuano by adoption? Hagbay ra siyang gisalikway ni Tomas.

* * *

TRIVIA -- Greetings sa atong mga higala diha sa Ubay, Bohol ... Ug sa atong readers diha sa Southern Leyte.