Malooy ka

Kaniadtong tuig 2007 mga huey helikopter ang nangatagak. Pagka tuig 2008 usa ka C-130 ang nahagsa. Sa miaging tuig 2009 natagak usab ang Presidential Chopper ug ning tuig 2010 Nomad plane na usab ang nahagsa. Kun imong subayon, sa kada tuig, aduna gayo’y abyon nga iya sa atong militar ang mahagbong gikan sa iyang paglupad. Malooy ka!

Tungod sa maong trahedya nakalas ang kinabuhi sa atong mga sundawo bisan og wala kini sa panggubatan. Gikutlo usab niini ang kinabuhi sa mga civilian nga naangin sa mga gubaon natong abyon.

Ang pagkahagsa sa Nomad nga eroplano nga mikalas og walo ka mga sundawo ug usa ka civilian makapamoderno na ba kaha kini sa atong militar? Ug kun dili man, kanus-a pa kaha himuong moderno sa kagamhanan ang atong militar? Unya na ba kaha kun gamay nalang ang mahabilin sa mga sundawo nga sakop sa atong Air Force? Ambot lang!

Panahon sa kagamhanan ni Fidel Valdez Ramos iyang gibaligya ang ektarya-ektaryang yuta sa Port Bonifacio alang kuno sa paghimong moderno sa atong militar apan ang binilyong halin hangtod karon wa gyod nato makit-i diha sa atong militar.

Kay ang atong gisaligan nga tura-tura matagak gihapon kun tiradoron, ang atong huey helikopter mahagsa kun mabitik sa tugot sa tambanog ug ang atong mga armas kun pabothon mobalik sa nagpaboto ang bala, kining tanan nahitabo only in the Philippines! Malooy ka!

Kun ang ubang kanasuran naglumbaanay sa paghimo ug pagpamalit og mga armas nga mga moderno, ang Pilipinas nagmantinil lang gihapon og mga gubaon.

Ang paghimong moderno sa atong militar nagdepende kini sa prioridad sa nagdala sa renda sa atong kagamhanan. Busa kun dili man prioridad niini ang paghimong moderno sa atong militar di unta nila hikalimtan nga ang kinabuhi sa atong mga sundawo ug ang seguridad sa nasud dili usab angayang ikompromiso.