Leksyon sa uban

Karong hapon, itunod na sa iyang lubnganan ang patay’ng lawas ni kanhi Press Secretary Cerge M. Remonde.

Sigurado ko nga daghan ang dili makapugong sa pagpaagas sa ilang mga luha nga magtan-aw ug maghuna-huna nga dili na gayod nila mahimong makita pa pag-usab ang ilang idolo.

Bisan gani ako, makalima ka higayon nga nagbalik-balik ko pagsud-ong sa dagway ni Cerge sulod sa lungon dihang gihaya siya sa Malacañang sa Sugbo niadtong Biyernes sa gabii.

Kahilakon ko apan ako g’yod nga gipugngan. Kaadlawon na ko nga mipauli apan mibalik pa g’yod ko kagahapon sayo sa buntag ug gisud-ong na usab nako siya pagbalik.

Bisan unsaon, daw sa dili pa g’yod ko makatoo nga mamatay si Cerge kay miapil pa lagi siya sa coverage namo sa DYLA niadtong miaging Sabado atol sa fluvial prosesyon sa imahen ni Sto. Niño.

Katapusan mi nga nagkita sa personal kaniadtong Pebrero 24, 2009. Dugay na kaayo no? Unsaon nga busy man kaayo siya ug mauwawon usab kaayo ko nga magpaduol kaniya kun moanhi siya sa Sugbo.

Suod g’yod nako si Cerge kay usa ka higayon gani, nagkauban kami sa pagkatulog sa usa ka lawak didto sa balay ni Mayor Tan sa Liloan, Southern Leyte atol nga siya pa ang direktor sa Dangerous Drugs Board.

Ako maoy nag-escort kaniya sa maong higayon. Mipalta g’yod ko sa akong trabaho sa The Freeman kay mihangyo man siya nako nga magpa-uban kay wala siya’y escort adtong higayuna.

Naputol lang ang among panag-uban dihang natudlo na siya sa Malacañang ug ako nagpabilin dinhi sa Sugbo. Iampo g’yod nako nga malangit unta ang iyang kalag.

Sayod hinoon ko nga pinangga usab si Cerge sa Ginoo kay relihiyoso kaayo siya nga pagkatawo. Goodbye na lang kanimo Mr. Remonde. Swerte ko nga nahimo kang kauban sa trabaho kaniadto.

* * *

Ang kamatayon ni Cerge angay’ng himoon nato nga leksyon. Dili g’yod nato pasagdan ug abusohan ang atong lawas. Wala ko magpasabot nga giabusohan ni Cerge ang iyang lawas, apan change-smoker kaayo siya kaniadto.

Sama nako duna usab ko’y gibati sa panglawas, apan mikalma na ko, ilabi na ang subra nga pagkaon ug pag-inom og beer. Gimenosan na nako ang pagkaon og karne, ilabi na ang litson.

Maayo unta og maleksyon kadtong mga tawo nga kusog kaayo manago og litson atol sa mga party sa tumong nga makadala og “bring-house.” He! He!

* * *

Dunay nag-ingon nga dili kaayo maayo og pangisip si Senador Noynoy Aquino. Maayo man lagi nga nanubag sa mga pangutana sa gihimong presidential forum niadtong miaging adlaw. 

Bisan ang ubang presidentiables maayo man nanubag gawas ni kanhi Presidente Erap Estrada nga taphaw ug tinubagan. Sa akong giingon sa una nga kun si Noynoy motamod g’yod sa gitugon kaniya sa iyang amahan nga si Ninoy Aquino, dili g’yod siya maghimo’g binuang sa kagamhanan.

Apan ang pangutana lagi mao kini. Kun buotan man si Noynoy ug dili mangurakut, unsa kaha ang mga tawo nga mahimo niyang mga alalay, ingon ba kaha g’yod kaniya og batasan?

* * *

Uwan-uwan na karon, angay kita nga magmatngon sa pagkuyanap sa dengue diha sa atong palibut.

Timan-i nga miabot na og 100 ang natakboyan og dengue dinhi sa dakbayan gikan lang kaniadtong Enero 1. Unya, sa maong gidaghanon usa na ang namatay.

Gikuyawan ko nga kun pabilin nga dili kita magtagad, basin og daghan pang kinabuhi ang makalas. Kun may ma-dengue sa atong mga sakop sa pamilya, daku ug kahigayonan nga manakod ang dengue sa uban.

Ang mga lamok nga makapaak sa tawo nga dunay dengue, makapatakud kun mopaak kini og laing tawo.

Gub-a ang mga itloganan ug puy-anan og lamok sa inyong palibot.