EDITORYAL - Pahuway na, Cerge

Usa ka balita niadtong Martes sa buntag nga nakapauknol sa mga sakop sa media dinhi sa Sugbu mao ang kalit nga kamatayon ni Press Secretary Cerge M. Remonde.

Si Cerge, lumad nga Sugbuanon (Argao), maoy bugtong taga Sugbu nga nagkupot og hataas nga katungdanan sa Malacañang.

Dinhi niya sa Sugbu sugdi ang iyang career kon karera isip magbabalita sa mantalaan ug sa radyo.

Milampos siya sa iyang napiliang karera pinaagi sa dedikasyon ug determinasyon diin nahimo kining lig-on nga pundasyon sa iyang trabaho alang sa nasud isip kalihim sa prensa.

Sa pagpanaw ni Cerge ang media sa Sugbu nawad-an og sakop nga angay’ng ikapasigarbo sa iyang mga kauban sa buhat.

Apan kita manghinaot nga bisan wala na si Cerge ang iyang dalaygong nga legasiya magpabilin isip ehemplo nga angay sundon sa mga nahibilin sa natad sa media.