Hapit na mawala sa passing ang mga Osmeña

Sulod sa dugay’ng panahon, sukad sa akong namat-a’g kahayag, ang lalawigan ug dakbayan sa Sugbo, giisip nga Osmeña country. Ilabina panahon ni Don Sergio ug ni Serging. Gani, daku ang akong kahibulong nga samtang dunay Quezon ug Quirino provinces, Roxas City ug mga dagkung kadalanan/highway sa kaulohan ginganlan after former presidents, ang ato dinhi, Fuente Osmeña ug Osmeña boulevard ra gyud.

Kaha, tungod kay si Don Sergio ug si Serging mismo wala kasudli’g bakukang ang ilang mga ulo, wala magsapayan nga dili sila kahatagan og appropriate nga pasidungog sa mga Sugbuanon. Maayo pa si Talyux kay naa pay Bacalso Highway.

Ingon man, ang present generation nga mga Osmeña, wala usab maghunahuna, ug wala mo-insister nga kinahanglan kahatagan og mas daku nga pasidungog si Don Sergio.

Anyway, ato ning nahisgutan dinhi tungod kay sa pagkakaron, naagaw sa mga Garcia ang lalawigan sa Sugbo, sila si Sonny, Lito, ug Serge, nakatilaw nag kapilde sa eleksyon, ug usa na lang ka Osmeña ang nagtikaw-tikaw, si Tomas.

Usa sa dakung hinungdan sa gradual nga pagkapukan sa mga Osmeña mao kining ilang pag-unay ug sa dili pagsinabtanay. Ug karon, nagdungan na usab sila pagpanglansar, nagkaatbang, ug maoy gikabalak-an sa mga Sugbuanon nga mahanaw ra gyud silang tanan sa natad sa politika.

Maoy gilauman sa mabuot nga mga Sugbuanon nga mag-usa silang tanang mga Osmeña, ug paluyohan ang bugtong Osmeña nga nagpabilin sa gahom. Apan, sukwahi sa gilauman sa kadaghanan, nagpadayon ang ilang panagsungi, ug gipaningkamotan pa nga mawala sa gahum si Mayor Tom.

Atong ma-imagine ang bahakhak ni Gobernador Gwen ug nila ni Atan ug MaryAnn niining pagsuportar sa ubang mga Osmeña pagpukan sa laing Osmeña. Kataw-anan palandungon.

Maayo man gani kay medyo lisud pukanon si Mayor Tom Osmeña, ug taliwa sa daghang mga intriga ug mga speculation, lisud usab pildehon si Vice Mayor Mike Rama.

Actually, ang isyo sa dakbayan sa Sugbo, regardless kinsay mga kandidato, mao nga kon ang mga Sugbuanon aduna may kasuko ni Mayor Tom, andam ba kita nga ang liderato sa dakbayan sa Sugbo, atong itahan ngadto sa laing tawo? Kinsa man ning mga tawhana? Ug mosugot ba usab kita nga ato nang ipa-wala sa passing ang tanang mga Osmeña dinhi sa lalawigan ug dakbayan sa Sugbo? Ikaw ray makatubag ini, Dro!