Pacquiao sa politics

Maraming beses nang dito ay nasulat

Pambansang Kamao upang di mawasak –

Huwag n’yang pasukin ibang parisukat

Tulad ng politics sa bansa’y pahirap!

Pero sa nakitang pagsisikap niya

May bagong ambisyong nais n’yang makuha;

Hangad n’yang pasukin itong pulitika’t

Sa larangang ito siya’y umaasa!

Sa bawa’t paglaban at pagtatagumpay

Bandera ng bansa ang hawak sa kamay;

At kung sa politics hangari’y marangal

Doon sa Kongreso siya ri’y palaban!

Kung di magbabago sa kanyang hangarin

Na siya’y tumakbo sa Kongreso natin –

At saka kung siya’y sawa na sa boksing

Pati panguluhan ay kanyang marating!

Nakita ng lahat kung siya’y may laban

Itong buong bansa ay tahimik naman

Ang lahat ng tao’y nanonood lamang

Kaya mapapansing tahimik ang bayan!

Sundalo’t rebelde’y hindi naghahamok

Sapagka’t sa boksing sila’y nanonood;

Mayama’t mahirap nasa diwa’t loob

Pambansang Kamao’y samahang manuntok!

Kaya kung sa Congress ay lalaban siya

At ang kabaita’y hindi mag-iiba;

Ang graft and corruption kanyang magigiba

Darating ang araw tayo’y sasagana!

Mahirap ang kanyang pinagda’nang buhay

Kaya alam niya ang wastong paggabay;

At kung itong bansa’y siya ang patnubay

Lahat ng masama’y tiyak hahandusay!

At kung sa halala’y di siya palarin

Ang sports sa bansa ang dapat harapin;

Lahat ng atleta’y kanyang paunlarin –

Upang sa Olympics bansa’y manguna rin!