Margot daug na daan!

Pagkaswerte g’yod sa dakbayan sa Sugbo kun mahimo na nga konsehal si Madam Margot Osmeña, ang asawa ni Mayor Tomas Osmeña.

Napanglantawan nako daan nga molambo na unya ang pagdumala sa Cebu City Medical Center kun muoyon si Margot sa akong awhag nga siya ang mag-chairperson sa Committee on Health and Hospital Services kun modaug na siya pagka konsehal.

Dili malalis nga sigurado na nga daug daan si Madam Margot pagka konsehal. Nagtoo man gani ko nga siya ang mopuli ni kanhi konsehal Hilario Davide III nga number 1 nga konsehal sa dakbayan basi unya sa makuha nga botos.

Dihang nagkita mi si Margot didto sa City Hall kaniadtong miaging semana, gilamano na nako siya daan sa iyang kadaugan bisan og wala pa siya maka-file sa iyang certificate of candidacy. Unique di ba? Ang hulga nga masirad-an ang Cebu City Medical Center hingpit na nga mahanaw kun si Vice Mayor Mike Rama na ang mahimong mayor, ilabi na kun anaa na si Margot sa konseho.

Mipahiyom si Margot dihang akong giingnan nga siya ang angay’ng mogunit sa pagka chairman sa committee on health and hospital services. Miingon hinuon siya “Ang Children diay?”

Misamot siya pagpahiyom dihang akong giingnan nga gawas sa health ug hospital committee, iapil usab ang isyu sa mga bata sa iyang komitiba. Wala man g’yoy laing angayan nga tugyanan niini.

Kun si Margot god ang mahimong chairperson sa health ug hospital committee, sigurado ko nga dili siya makapasagad lang sa kakuwangan diha sa CCMC. Mao kini ang kuwang ni Konsehal Christopher Alix kay wala man siya’y kaisog nga moinsister pagmugna og proyekto nga supak sa mayor.

Daghan og kwarta ang dakbayan, ilabi na kun ayuhon lang g’yod sa pagpangolekta ang atong mga buhis. Aw bisan karon, daghan man og kwarta ang dakbayan apan kuwang ang aksyon ni Konsehal Alix.

Ang nakadaut lang god ni Konsehal Alix kay dili hapit motingog kun anaa sa konseho. Mosinggit ra man dayon og “second” kun dunay mohimo na og mosyon. Unya kun dunay isyu sa CCMC, di kamao manubag. Paita!

Nagpareho lang si Konsehal Alix ug si Dr. Myrna Go, ang hepe sa CCMC nga kun dunay isyu sa gidumala niyang ospital mahadlok motubag sa media. Nakahinan-aw ra tawon siya sa iyang gidumala nga ospital nga pwerteng hugawa, daghang uk-ok.

Swerte lang si Dr. Go kay kun masakit siya, dili man siya magpatambal diha sa CCMC. Wala g’yod ko malimot dihang gibalibaran ko ni Dr. Go nga interviewhon unta nako siya sa subsob nga pagkamatay sa mga pasyente sa dengue sa CCMC.

Gawas nga mugtok kaayo og dagway nga miawhag nga si Dr. Alix lang ang ipa-interview, gibiyaan pa ko diritso ug midayon og sakay sa iyang service vehicle nga wala gani moingon nga molakaw na siya. Husto ba ang iyang gipakitang batasan?

Isugyot nako nga sa bag-o unya nga administrasyon sa dakbayan, maayong hulipan kini si Go pagka hepe sa CCMC.

* * *

Ang labing dakung kompaniya sa Sugbo, ang Aboitiz Group of Companies, maoy mitakda og labing sayo nga Christmas party sa mga sakop sa media.

Daghan kaayo sila og mga gipadala nga imbitasyon alang sa Media Christmas gathering nga himoon unya sa Disyembre 2. Adto kini himoa sa Port of Pristina North sa barangay Talamban.

Kining Pristina North usa kini ka high-end wide subdivision nga gipanag-iya sa mga Aboitiz.

Bilib g’yod ko sa Aboitiz kay matag tuig, lainlain ang ilang pakulo ngadto sa mga sakop sa media. Tambag hinoon nako, kadtong wala makadawat og imbitasyon, magbaton lang ta og kaikog.