Pagkalooy nato

Sa wala pa ko magsugod pagsuwat sa akong balita kabahin sa pagpirmahay og Sister City Relationship ni Mayor Tomas Osmeña ug ni Mufi Hannemenn, ang mayor sa Honolulu, Hawaii, gitan-aw usa nako ang ilang official website.

Nauwaw kaayo ko kay pagkalayo ra g’yod sa atong website sa dakbayan sa Sugbo kun itandi sa website sa Honolulu.

Niining pagsagop na nato sa modernong teknolohiya, angay unta nga ang dakbayan sa Sugbo dili magpabentaha. Ang dakbayan sa Sugbo maoy giila nga “Queen City of the South” ug “Hara sa Kabisay-an ug Mindanao.”

Apan mora og nataligam-an sa atong mga opisyal sa dakbayan ang pagpalambo sa atong official website. Kun gusto gani kita nga mahimong inila sa ubang kanasuran, angay nato nga palamboon ang atong website sa dakbayan sa Sugbo.

Sa Honolulu, pag-open pa lang nimo, makita mo ang tag-as kaayo nga building sa ilang dapit nga nagpaila nga malamboon g’yod ang ilang lugar.

Sa atong website, ang makita nimo mao ang South Road Properties (SRP), apan gawas nga dili maayo nga pagkadumala ang atong website, dili pa g’yod mo-function ang uban.

Sa website sa Honolulu, mahimo ka nga mobasa sa mga giaprobahan nila nga ordinansa, mahimo ka nga motan-aw sa video sa ilang sesyon ug sa mga committee hearing.

Mahimo ka nga makakuha og inpormasyon kun unsaon nimo nga makapaambit ka sa imong sentimento kabahin sa isyu nga isumiter og public hearing.

Anaa usab sa ilang website ang mga detalyi kabahin sa eleksyon ug daghan pa. Pastilan, wala ko makapugong, akong gi-teksan si Mayor Osmeña sa akong naobserbahan. Ambot unsay iyang huna-huna kay wala man motubag.

Kun ako ang pahatagon og tambag, mas maayo tingali nga si Mayor Tommy magdistino og pipila ka sakop sa iyang Mayor’s Management Team (MMT) aron modumala sa atong website.

Aron sila mahatagan og ideya, maayong tan-awon nila ang official website sa City and County of Honolulu.

* * *

Maayong balita alang niadtong mga wala pa makaparehistro sa ilang mga armas. Gilugwayan sa kagamhanan ang amnesty period hangtud sa Nobyembre 30, diin makapalisensya kamo sa inyong armas nga dili hasol.

Ayaw mo pagpaabot nga moabot ang deadline unya adto na usab kamo magdali-dali.

Pwerte ra g’yod nga baratoha sa bayranan sa pagpalisensya. Tiaw mo nga P1,000 ra niadtong mga wala pa gayod malisensyahi ug P650 niadtong mga armas nga lisensyado apan mi-expire lang ang lisensya.

Ako lagi, napugos kog kuha sa Thompson sub-machinegun sa akong Lolo nga dugay na niyang gitipigan ug akong gipalisensyahan. Bug-at hinoon kaayo kay 45 kalibre god ang bala.

Hala, kamong uban diha nga hilig og armas, pahimusli ninyo ang tanyag sa kagamhanan kaninyo.

* * *

Nalipay ko sa pasalig ni Zapatera barangay captain Joemarie Benedicto ug sa iyang amahan nga si Konsehal Frank Benedicto nga moabang na sila og luna alang sa ilang mga sakyanan sa barangay aron dili anha nila iparking sa daplin sa karsada.

Gihatagan sila og laing sakyanan sa City Hall niadtong Biyernes. Ako silang gidaygan sa kahasol sa moagi diha tungod sa ilang barangay hall.

Sigi lang, maayo unta og dalion nila pagkuha og parking area sa ilang mga sakyanan.

Kun molikay god na sa karsada kay naa man ang ilang mga nag-parking nga sakyanan, unya madam-agan kita sa ikasugat nato nga sakyanan, aw wala g’yod ta’y dag-anan sa kaso.