Pagsabog ng Bulkan

NAGMISTULANG paraiso ang mga lansangan ng Metro Manila nitong nakaraang holiday weekend. Marami pa rin ang nagbakasyon o bumisita sa kanilang patay sa probinsiya. Dahil sa banta ng bagyo, kakaunti ang naki­pagsapalarang lumabas ng bahay. Ang resulta — walang trapik!

Sanay na ang mga motorista at namamasahe na su­ma­sabak sa trapik na mabulok ng matagal sa loob ng sasakyan. Sa kultura nating mga Pinoy, tanggap na ito bilang bahagi ng ating pang-araw-araw na realidad. Gigising na lang ng mas maaga, dadagdagan ang pasen­siya, titiisin ang usok.

Sinukat ng World Bank (WB) ang halaga ng nasasa­yang na oras ng empleyado at sa nagkakasakit sa po-lus­yon. Umabot ang estimate sa halos P95 billion kada taon o halos P277 million kada araw!

Sa ginawang pagsuri, ang sinisisi sa traffic congestion ng EDSA ay ang masamang pagplano ng mga kalye’t lansangan; ang pagdami ng mga sasakyan lalo na ng mga bus; at ang hindi maayos na pagpatupad ng mga traffic rules and regulations.

Ang EDSA ay ang kaisa-isang highway na tumutuhog sa kabuuan ng Metro Manila. Napakalaking tulong sa ating ekonomiya kung maiayos ang mga problema nito nang mabawasan ang mga higanteng gastusing nala­lagas gaya ng tinukoy ng WB. Ang pagpapabilis din ng daloy ng traffic ay magsisilbing mitsa upang mapagaang ang dalahin ng industriya at mga propesyon.

Ang isa pang side-effect nito ay ang mabawasan ang init ng ulo ng mga motoristang panay ang putok ng galit. Kung mapatunayan ang paratang ni TV personality Cheryl Cosim na mayroon ngang na­ nutok sa kanila ng baril dahil lang sa pakikipag­git­gitan ng sasakyan, pina­kahuli lang ito sa humaha­bang listahan ng alitan ng motorista. Ang Pinoy driver, gusto lang laging na­ka­ka­isa. At kulang sa disiplina. Pero noon ay hindi ito basa­gulero. Ewan ko lang at pa­rang unti-unti nang nagba­ba­go ang ugaling ito. Ang naiisip ko lang na sanhi ay ang ara­wang pagkulo nito sa traffic.

Kung nakatutok ngayon ang atensyon ng pamaha­laan sa mga solusyon sa kalami­dad, huwag sanang limutin ang problema ng traffic.

Hindi lang natin napa­pan­sin subalit maaring ang pag­sa­bog nitong “social vol­cano” ang siya pang ma­g­­dulot ng mas malaking dis­grasya sa lahat.