Murder and arrogance

Human sa pipila ka adlaw nga pagtago-tago, patay ang upat ug usa ang nadakpan sa notorious nga hugpong sa mga tulisan sa lungsod sa Compostela sa lalawigan sa Sugbo kaniadtong miaging semana. Apil sa napatay mao si Alvin Flores ang pangulo sa Flores Robbery Group kinsa maoy mihimo sa mga dagkong tulis didto sa kaulohan ug miangin sa daghang kinabuhi sa mga tawo atol sa ilang pagpangtulis. Ang pinaka-ulahi sa ilang giigo mao ang tindahan sa mga mahalong relo sulod sa usa ka Mall didto sa Makati sa kaulohan.

Mga sakop sa National Bureau of Investigation Manila ang misunod ug mipatay sa grupo ni Flores. Giingon sa NBI nga resulta sa pinusilay ang kamatayon sa maong mga tulisan tungod kay misukol kini sa dihang gipatuman ngadto kanila ang warrant of arrest.

Apan kinsa man ang patoohon sa NBI nga ang pagpakig pinusilay ngadto kanila ang namatyan sa mga tulisan? Nakigpinusilay gyod kaha sa mga sakop sa NBI Manila ang mga tulisan o igo lamang kini nilang gipamusil. Sigon sa mga tawo nga nanimuyo dili layo sa nahitaboan milanat og mga 15 minutos ang gidugayon sa boto-boto sa mga bala sa armas ang ilang nadungog. Sa maong gidugayon sa pinusilay way bisan usa sa sakop sa NBI Manila ang nasamdan. Ang maong pinusilay wa gani kini makaguba sa ilang hinapay. Ingon ana kaabtik ang mga sakop sa NBI?

Sigon sa mga reporter nga nakasulod sa dapit nahitaboan dili sayon sudlon ang maong dapit ug layo ang balay sa gate busa igo gayod nga makapangandam ang mga tulisan kun aduna may mosulod sa ilang nahimutangan nga dili nila kaila. Apan wa maglisod ang NBI pagsulod sa dapit. Ingon ana ka ngilngig ang mga sakop sa NBI?

Pero adunay mihong-hong kanako nga ang duha sa mga tulisan diha ra madakpi sa Basak ug North Reclamation Area ning dakbayan sa Sugbo ug didto tapoka sa Compostela. Di kaha ni ang rason kun nganong sayon rang nakasulod ang NBI sa gitagoan sa laing kauban sa mga tulisan ug sa ilang pagsulod gidayon kini nila paghipos? Dili kaha to Murder ang gihimo sa taga NBI Manila ngadto sa mga tulisan? Hinoon ang maong mga tulisan angayan lang upod nga hiposon kay sagbot sila sa atong katilingban pero kun patyon man gyod gani ayaw lang upod ninyo ipaklaro.

* * *

Gipalabay una sa taga NBI Manila ang lima ka oras una pa pasodla ang mga local police ug mga sakop sa Media. Nanglimpyo pa man ugod sila sa dapit nahitaboan. Seguro nagtoo sila nga ang miabot ilang mga bisita busa nanglimpyo pa sila sa dapit nahitaboan sa wa pa nila pasudla ang mga police ug media. Hinungdan nga sa pagsulod na niini limpyo na kaayo ang dapit ug kandila na lang nga hapit na maupos ang naabtan. Hapit mahurot ako bilib ning NBI kay di lang ni sila abtik, di lang ni sila ngilngig, limpiyado pa gyod ni sila.

* * *

Suko kaayo si PNP Director General Jesus Versosa sa iyang mga police dinhi sa Sugbo tungod kay wa gyod siya masayod sa nahitabo sa mga tulisan, si Pangulong Arroyo pa ang nagpahibalo kaniya sa nahitabo sa grupo ni Alvin Flores dinhi sa Sugbo.

Ay naku! Unsaon man tawon pagpahibalo sa imong mga sakop diha nimo General Versosa sir nga gihimo man lang kingkoy sa mga taga NBI Manila ang imong mga police diri sa Sugbo. Magpasalamat gani ka nga buhi pa ang usa nimo ka police nga gipaligsan lang sa mga HAMBUGERONG taga NBI Manila samtang nagkontrolar sa traffic sa dapit.