Miaginod na gyud ang kaso ni Ecleo

Sa pag aginod sa kaso ni Ecleo maoy unang gipuntarya sa prosecution ang piyansa nga gitugot niini ni judge Generosa Labra nga balor og usa ka milyon ka pesos agig bugti sa iyang temporaryong kagawasan.

 Gusto sa prosecution nga kanselaron ang piyansa ug ibalik na pagbalhog sa prisohan si Ruben Ecleo Jr. tungod kay ang gihimong rason niini sa pagpiyansa nawagtang na tungod kay dili na kini masakiton ug lig-on na kini og lawas.

Dili sa pagdapig ni Ecleo ug dili pagtandog sa merito sa kaso, mas maayo segurong mao na lay tutokan sa prosecution ang pagkonbikto ni Ruben Ecleo Jr. kun gusto man gyod nila nga ibalhog sa prisohan kining maong akusado.

With due respect ngadto sa mga bantogang abogado sa prosecution, mas maayo segurong maoy unahon niini ang pagtoon kun unsaon nila pagkonbikto si Ecleo gamit ang mga gidugtong ug gisumpay lamang nga mga ebidensiya tungod kay sa duwa pang baseball wa pa ra ba tawon ni maka first base ang prosecution.

Kun tuyo man gyod sa prosecution nga ipapriso si Ecleo, di ila kining ipakonbikto sa atong hukmanan gamit ang lig-ong mga ebidensiya, di kay ipapriso lang si Ecleo pinaagi sa pagpakanselar sa iyang piyansa.

Kun mabalik ugod si Ecleo sa prisohan tungod kay gikanselar ang iyang piyansa, ang iyang pagpuyo sa prisohan kadiyot o temporaryo lamang kun ugaling maabsuwelto siya sa kaso nga iyang giatubang. Apan kun konbiktohon si Ecleo, matilawan gyod niya sa hingpit ang kinabuhi sa usa ka piniriso kana kun dili siya hatagan og pabor sa atong mga jail officials ug kagamhanan. Busa mas maayo nga ang prinsipal nga kaso ang ilang tutokan ug dili ang piyansa.  

Ako nagtoo nga timailhan sa kahuyang sa prosecution ang pagpamugos sa pagpapriso pagbalik ni Ecleo pinaagi sa pagpakanselar sa iyang piyansa. Nagpasabot lang kini nga maglisod sa pagpakonbikto ni Ecleo ang prosecution busa agig pakonsuwelo sa publiko nga nagbantay sa kaso ila lamang kining ipapriso pinaagi sa pagpakanselar sa iyang piyansa.

* * *

Nakuratan sila si Kongresista Eddie Gullas ug Pabling Garcia sa dihang gikasab-an ni Mayor Tomas Osmeña ang taga DOTC nga mipresentar sa plano niining magbutang og LRT dinhi sa Sugbo nga magbiyahe gikan sa dakbayan sa Talisay paingon sa dakbayan sa Mandaue. Gisupak sa mayor ang pagbutang og LRT dinhi sa Sugbo.

Klaro ug tataw kaayo nga personal ang rason sa mayor sa pagsupak sa LRT. Una, mosumpaki kini sa iyang planong BRT ug ang ikaduha mao ang dili maayo niyang relasyon sa proponent niini nga si kongresista Eddie Gullas. Unya ang ikatulo basin di ta gustong pasakyon ni Mayor Tom og train kay pasakyon lang ta niya og bus.