Magkadugay magkabahaw

Matud pa nila nga kuno ang mga asawa magkadugay magkabahaw sa panan-aw sa ilang bana, apan ang wala lang nila hisayri nga daghang mga silingan ang kusog pud diay mohuong og bahaw. Pastilan!

Sa ebanghelyo karong Domingoha, gipresentar ang duha ka hut-ong nga matawag nato nga anaa sa margins sa kinabuhi. Ang babaye ug ang kabataan. Ang kababayen-an sa kapanahonan sa atong Ginoo ang giisip lamang nga daw kabtangan sa usa ka lalaki. Ang kabataan, nga nahimong magsalig lamang sa pag-atiman sa ilang mga ginikanan ug walay kaugalingong tingog diha sa katilingban. Apan ang atong Ginoo nag-isip kanilang bililhon sama sa uban. Apan atong hatagan og igong polus ang mahitungod sa kaminyoon.

Usa sa mga kinahanglanon aron magpabiling lig-on ang kaminyoon mao ang paghimo sa usa’g-usa nga mas masuod pa gayud pinaagi sa makanunayong pag-ila sa usa’g-usa. Gitawag kini sa iningles og Intimacy. Matang sa Intimacy nga dili lang nato ma-limit sa pisikal kondili integral. Nga sa ato pa, ang bana magkadugay ang mosud-ong sa iyang asawa ingon og kabahin gyud niya. Sagrado ang kaminyoon ug padayong mapuy-an ang kasagrado niini kun ang magtiayon ang mogahin gyud og igong panahon aron mas mapalambo ang relasyon uban sa grasya ug panalangin sa Dios.