Simpatiya sa kauban

Natandog ko sa pagpakabana ug simpatiya sa usa ka batan-ong board member ngadto sa ilang kauban nga si bokal Juan Bolo tungod sa kontrobersiya niini nga giatubang maylabot sa pagpalit sa probinsiya sa Balili property.

Ang batan-ong bokal mipadala og suwat sa usa ka lokal nga mantalaan aron ipadayag ang iyang mga huna-huna maylabot sa kontrobersiya. Nangutana siya sa iyang suwat kun nganong daw bula nga nangahanaw ang mga higala kanhi ni Bolo.

Daw wa nay higala si Bolo diha sa hunta probinsiyal tungod hapit tanang iyang kauban buot man siyang iduot sa kontrobersiya. Ang uban hinuon nagpakahilom sama sa ilang naandan nga binuhatan may kontrobersiya man o wala.

Nangindahay ang batan-ong board member nga unta sa media dili mapalab-anan ang pagpaburot sa isyu. Nanghangyo sab siya og tabang sa katawhan pinaagi sa ilang pag-ampo nga unta mahatagan na og kasulbaran ang maong kontrobersiya.

Apan nganong pinaagi man sa suwat ngadto sa media gipadayag sa maong batan-ong board member ang iyang mga huna-huna? Nganong di man didto sa hunta probinsiyal siya motingog ug moapil pagsukit-sukit sa iyang kauban nga nalambigit sa kontrobersiya aron siya malamdagan?

Mas magmabungahon ang iyang mga lihok kun didto sulod sa session hall niya ipadayag ang iyang mga huna-huna inay nga didto sa mga mantalaan. Mas dunay hinungdan ang iyang paglingkod isip representante sa mga tawo sa iyang distrito kun tinud-anay niyang dad-on ang tingog sa mga tawo inay nga magpasinaw lang siya sa bangko.

* * *

Tulin pas alas kwatro nakalibkas ang Maritime Industry Authority sa suspension order sa Aboitiz Transport. Wa pa gani mahuman sa hingpit ang imbistigasyon sa pagkalunod sa Super Ferry 9 didto sa Mindanao apan gilibkas na sa Marina ang suspension sa ilang mga barko.

Ang Sulpicio Lines nga gilumotan na sa kadugay sa hitabo hangtud karon wa pa gyud tugoti pagbalik nga makapamasahero.

Kun buot huna-hunaon mas angayang ang Sulpicio Lines maoy libkason ang suspension tungod kay tataw nga bagyo maoy hinungdan sa pagkalunod sa MV Princess of the Stars.

Ang Super Ferry 9 nagpabiling tanghaga hangtud karon nganong nalunod nga wa man untay bagyo atol sa hitabo. Kun way bagyo sa ato pa nga pagpasagad sa mga tripolante ug kompaniya ang posibling hinungdan niini.

Bisan unsaon paglimod sa mga opisyal sa MARINA apan tataw nga ang impluwensiya sa mga Aboitiz nga naglingkod diha sa Marina board ang hinungdan nganong dali kaayo ang gobyerno nga nakalibkas sa suspension order sa ilang mga barko.

Ambot nganong gitugotan nga dunay mga Aboitiz nga gitugotan diha sa Marina board nga tataw man kaayo ang conflict of interest niini. Ingon na ba lang gyud niini ka manhid ug ka garapal ang atong gobyerno?

* * *

[email protected]