Presidente Barack Obama gitulisok sa kongresista

CEBU, Philippines - Samtang nagsulti si US President Barack Obama atol sa joint session of Congress, usa ka Republican nga kongresista ang mibarog ug misinggit; "You lie!" dungan ang pagtulisok sa Presidente. Grabe!

* * *

Admitido ang mga Republicans nga usa ka pagbinastos ug pagpakita'g wa'y respeto ngadto sa ilang Pangulo ang gihimo sa ilang kapartido.

* * *

Daghan man nga mga Pinoy nga kongresista nga wa'y taas og grado -- naa man ganiy grade four ra -- pero makamao man molihok desente atubangan sa Pangulo bisan ila kining gitamay.

* * *

Dinhi sa ato sa Pilipinas grabe ang mga pulong nga binastos (gutter language) ang gibato ngadto's atong Presidente, apan gikan kini sa mga wa'y gradong mga sakop sa militanteng pundok.

* * *

Wa pa kita makakita o makadungog nga dunay kongresista nga mitulisok sa Presidente ug mosinggit ngadto kaniya nga bakakon o tikasan. Gani, atol sa iyang SONA ang mga kongresista magsige la'g pakpak bisan di angay pakpakan.

* * *

Adtong miaging buwan, ang mga sakop sa Parliament sa Taiwan nagsinumbagay taliwala sa ilang session. Kataw-anan tan-awon. Pulos nag-amerikana (coat & tie) unya nagrambol.

* * *

Wa pa kita makakita og susama nga eksena dinhi sa atong Kongreso. Diha toy hapit na magsinumbagay ang duha ka kongresista nga nag-barong apan napugngan sa mga killjoy. Hehe.

* * *

Condolence ngadto ni Mila Tigue, sakop sa atong production department, kang kansang amahan namatay didto sa ilang bay sa Bohol.