Komplikado
Nipadayag na sa posibling lakang nga himoon sa hunta probinsiyal si Vice Governor Greg Sanchez, ang pagpakawalay bili sa hingpit sa kontrata nga gisudlan sa lalawigan uban sa Balili estate, pinaagi sa pagdangop sa hukmanan aron i-rescind ang deed of sale sa dul-an sa 25 hektaryas nga luna ug mabawi ang P99 milyones nga nabayad sa kagamhanay ngadto sa pamilyang Balili.
Si Sanchez mi-abli sa maong posibilidad human maklaro na sa nagpadayon nga imbistigasyon sa Hunta Probinsiyal ang pagpug-ok sa kasayuran maylabot sa tinud-anay nga sitwasyon sa yuta.
Nagtudtud na ang chairman sa appraisal committee nga si provincial assessor Anthony Sususco ug si Bokal Juan Bolo. Si Sususco miingon nga nahibawo si Bolo sa sitwasyon sa yuta tungod kay ni uban ni sa ilang ocular inspection. Nangangkon sab si Sususco nga iyang gihatagan og kopya si Bolo sa report sa technical working group nga naghatag sa klarong description sa luna nga gipalit sa probinsiya.
Apan niadtong Biyernes atol sa pagpadayon sa provincial board sa ilang pakisusi gibakwi na ni Sususco ang iyang pamasangil kang Bolo. Matud niya nga nag-presume lang kuno siya nga gilakip didto sa folder nga gisudlan sa ilang resolution ang report sa TWG nga gisubmitir ngadto kang Bolo.
Napugos og bakwi si Sususco kay wa na man siya'y kapasanginlan sanglit ang iyang giduot nga maoy nagpadala sa folder nga si Mariflor Vero didto naman mitambong uban niya sa hearing sa ad hoc committee.
Ang wala itug-an ni Sususco mao nga ang naghatag sa report sa appraisal committee ngadto sa opisina ni Bolo mao ang iyang umagad nga si Walter Ypil nga kaniadto usa sa mga kawani sa iyang buhatan.
Ang folder gikuha sab sa iyang asawa nga si Clarisa Sususco nga usa sa mga staff ni Bolo. Wa na magkadimao ang pamahayag ni Sususco tungod kay sa tinuod lisod kaayong depensahan ang ilang kapakyas paghatag og gibug-aton sa TWG report sa ilang final resolution nga maoy gibasihan sa probinsiya pagpalit sa hingpit sa yuta.
Wa gyu'd maghisgot ang resolution sa appraisal committee sa description sa yuta sigun sa report sa TWG. Buot ipasabot nga tinuyo o dunay intensiyon sila nga tabunan ang tinud-anay nga sitwasyon sa yuta.
* * *
Kun mangusog ang probinsiya nga i-rescind ang pagpalit sa yuta unsa may mahitabo sa laing kasabutan nga gisudlan sa probinsiya uban sa Korean Power Corporation paggamit sa Balili property nga labayanan og coal ash gikan sa ilang planta? Dili ba maapiki ang probinsiya sanglit nidawat na raba ni og pasiunang bayad gikan sa Kepco? Asa naman mangita og luna ang Kepco nga ilang labayan sa coal ash? Mosugot og sa dili ang Kepco apektado ang ilang proyekto tungod kay ang luna nga labayan sa coal ash usa ni sa mga condition nga gilatid sa Environmental Compliance Certificate nga giisyu sa Department of Environment and Natural Resources ngadto sa Kepco. Kun mapornada ang proyekto sa Kepco dili ba mamiligro ang probinsiya nga ikiha sa Kepco ug pangayoan og danyos? Labihan gyud ka komplikado sa sitwasyon karon sa probinsiya ug kining tanan bunga ni sa kadanghag.
Kun kinsay nagdanghag, nasayod na ang publiko ug alang nako dili kapanghunaw si Gobernador Gwendolyn Garcia tungod kay bisan pa og tinuod nga wa siya masayod sa sitwasyon sa luna, apan wa niya buhata ang husto sa wala pa niya bayri ang luna.
Ang husto nga gibuhat sa gobernador mao ang pagmando gyud nga dunay relocation survey aron matino ang mga boundaries ug nasayran unta nga dunay kabahin sa luna nga ilang gipalit ang dagat ug katunggan.
* * *
- Latest
- Trending
