Friendster!

Kun mangita kag higala, o gusto kang magpahigala pinaagi sa internet, mobukas kag account sa Friendster ... mahimo ibutang nimo ang imong retrato, aron mahibaw-an ka nga gwapa o gwapo.

Sa among panahon, penpal ni. Kasagaran ipaagi sa mga magasin. Lipay kaayo tang makakita sa atong nawong napatik sa magasin. Mosunod dayon ang sinuwatay. In my case, diha’y akong mga penpal sa Leyte, Bukidnon, Cagayan de Oro, ug Bohol. Kugihan kaayo kong mosuwat. Hasta tagpila ka pages. Ilabina kun maayo sad mosuwat ang akong gika-penpal.

High School pa mi … ug medyo nabaid ang among Iningles. Pag-college wa na. Apan, sa akong pag-eskwela sa Xavier University sa Cagayan de Oro, diha’y akong naila-ila nga na-penpal nako sa high school pa. Anyway, that was yesterday.

Karon, dali ra kaayo kang kakita og friends. Kugihan lang kang mo-text, daghan kaayo kang ma-higala, ug di kinahanglan maayo kang mo-Iningles. Gani, inig-text nato, maningkamot man ta unsaon pag-ngil-ad ang Iningles. Ingonman, sa Friendster dali ra sad kang mailhan. Mao kini ang resulta sa advanced technology sa communication ug information.

Apan, gumikan sa cellphone, daghan usab ang nangamabdos, ug nabiktima sa mas grabe pang katalagman. Sa ato pa, dili tanan nakahatag kanato’g kaayohan ang modern technology.

Si Pete, mga alas 8 sa gabii, naghuwat sa iyang inahan ug ig-agaw atbang sa gate sa usa ka subdivision sa Manila. Kalit, napulo ka teenager ang miduol, mikulata ug midunggab kaniya – patay. Nahitabo kini sa miagi Hulyo 15, ning tuiga.

Ug sama sa ubang mga kriminalidad, ang mga tagtungod wala maglaum nga madakpan ang mga mangtas nga teenager. Apan tungod lagi kay ang crime does not pay man gyud, ug ang long arm of the law, sa dugay’g madali, muabot man gyud kanimo, usa ka higala sa igsoon sa gipatay, misugilon nga iyang nakit-an sa Friendster ang hulagway sa usa sa mga teenager. 

Ila kining gi-download ug gihataga’g kopya ang police. Tulo ang nasikop, ang usa nakita usab sa Friendster. Ang tulo aduna nay daang record sa kapolisan, na-involved sa panulis ug pang-rape. Sa atong pagsuwat niini, gipangita pa ang mga kauban sa tulo.

Ang ilang pagpa-Friendster ... ila kining na-overlook. Wala sila magdahom nga lakip sa makig-friend nila, ang kapolisan. Mao nga Dro, kun duna kay mga kabilinggan sa imong kinabuhi, ayaw na lag apil-apil anang Friendster-freindster.