Maayo ra uy

Nadam-ag sa usa ka poste sa koryente didto dapit sa V. Rama Avenue kagahapon ang usa ka motor nga giangkasan og tulo ka tawo nga mipaturatoy pagpadagan dihang gipahunong sila sa Citom enforcer.

Maayo ra! Dili g’yod angay’ng kaloy-on ang maong mga tawo, ilabi na ang drayber.

Gipara sila sa traffic enforcer kay nakalapas na man sila sa balaud tungod sa pagsakay og motor nga tulo sila kabuok, unya wala pa gayo’y crash helmet.

Ang pagmaneho og sakyanan dili katungod sa usa ka tawo, privilege lang ang gihatag kanila sa kagamhanan nga maka-drive og motor. Sa ato pa, motuman g’yod unta kamo sa balaud.

Unsaon, pagka karon pwerteng daghana na g’yod nga mga abusadong drayber.

* * *

Kaniadtong Sabado, may mekaniko og sakyanan nga sa samang higayon drayber usab, nga mitug-an nako nga lisod kuno karon ang pag-apply og bag-ong driver’s license kay duna’y examination.

Igo lang ko nga mikatawa. Giingnan nako siya nga sayon ra man kaayo ang examination, apan ingon siya nga duna kuno’y uban nga lisud tubagon.

Ako siya’ng gipangutana unsa man pananglit. Sama kuno sa gipangutana kun pila ang tukma nga distansya kun magsunod ka og laing sakyanan.

Nakapahiyom ko kay diha pa nako mahibaw-i nga sa ingon lang nga pangutana dili sila makatubag? May laing driver nga akong gipangutana nga diha usab sa grupo, wala makatubag.

Karon god, bisan ako wala motuman sa gilatid nga tukmang distansya kun magsunod og laing sakyanan kay ang ubang drayber nga abusado, mokalit lang og sulod sa imong “lane” gikan sa pikas.

Ingon niana ang pangutok sa daghang drayber. Unya kun sila madam-agan tungod sa ilang binuhatan, sigurado nga ikaw nga nakadam-ag maproblema.

Kun ikaw nga usa ka traffic enforcer, dili ka ba masuko? Kamong mga abusado nga drayber, huwata lang kun mohatag na pagbalik og “go signal” ang LTO-Manila nga ilusad na usab ang pagdisiplina sa mga drayber, hilam-os g’yod mo sa multa.

* * *

Ang maayo pa ninyo nga mga banggiitang kriminal nga anaa sa prisohan, diha na lang pagpatiguwang. Kun mogawas mo pinaagi sa pagpyansa, posible nga patyon ra mo.

Sa akong bahin, dili g’yod ko malooy og kining matanga sa mga tawo pamusilon sa mga “vigilantes” iniggawas pa lang nila sa prisohan.

Sama adtong gipatay sa miaging adlaw, klaro man to nga sila g’yod ang nanulis sa usa ka jewelry dealer. Nangangkon man gani kadto sila sa ilang nahimo.

Ang lusot nila niadto mao na lang ang pagpalusot sa mga balaud didto sa korte. Sayop g’yod unta ang pagpatay, apan tingali ang naghimo niadto, gipul-an na tingali nga kun makagawas, basin mohimo lang gihapon og laing krimen.

Hala, kamong mga banggiitang kriminal diha, pasaya-saya lang gihapon kay basin og kamo’y sunod nga target sa mga vigilantes.

Bisan sayop ang binuhatan sa mga vigilantes, apan pabor ko basta ang himoan nila og kampanya mga badlongon sa katilingban.

Ilabi na kining uban nga hilig kaayo magpabutang og patik sa ilang lawas aron ipanghambog nga sila isog, maayo ni nga unahon.

* * *

Pakampanyahan kuno sa mga opisyal sa kabarangayan ang mga videoke karaoke machines nga walay sound reduction devices kun patingogon kini sa gabii.

Unsaon nga ang ubang manganta yabag man god. He! He! Tan-aw nako, dili kini mahimo sa mga barangay opisyal nga talawan kaayo kay mahadlok og dili makadaug. Ayaw na lang ko.