EDITORYAL - Kadtong P1-M nga panihapon

Bisan unsaon ni Presidente Gloria Arroyo ang pagdepensa sa iyang kaugalingon kabahin sa kontrobersiyal nga panihapon didto sa New York diin ang chit miabot sa usa ka milyon ka pesos, guba gyud ang iyang imahe sa mata sa Pilipinhong lungsuranon ilabi na adtong mga naglisud og kaon tulo ka beses sa usa ka adlaw.

Daghan gihapon ang nangyamiid ug mga naglingo lingo sa ilang ulo sa rason nga gihatag sa atong Pangulo nga ang kuwarta nga gibayad sa P1 million dinner dili gikan sa gobiyerno.

Ang mga tigpaniid dili modawat sa maong pangatarungan. Bisan kinsa pang pribadong Tal Pulano ang nagbayad sa P1 million chit aduna gihapoy mangil-ad nga bulok alang sa Pangulo ang pagsalmot sa maong panihapon.

Tungod kay dinhi sa Pilipinas daghan ang naglisud sa ilang pagkaon, dunay moral implication ang maong isyu.