Bugalbugal sa pagka-mayor

Dili na mabangbang ang panaglagyo sa manag-alyado sa politika sulod na sa dugay’ng mga katuigan bunga sa kalagot ug intriga sa mga kauban sa grupo.

Lisud na pahulian si Mayor Tomas Osmeña sa iyang kasuko ngadto ni Kongresista Antonio Cuenco sa habagatang distrito sa siyudad sa Sugbo maoy hinungdan nga tanang pangdaot buhaton niini.

Apan nagtuo ko nga bisan unsang pangdaot nga mogawas sa baba ni Tomas, ang mga tawo mopiyong sa makadiyot aron sa pagtimbangtimbang kun tinuod ba o dili ang iyang gipanulti. Ang nakanindot tingale, si Tomas utrong naghunahuna unsa ka tinuod ang iyang gi-estorya.

Dili ko makaingong tinuod o dili ang iyang gipanulti tungod kay pareho lamang ako ninyong mga magbabasa nga ‘observer’ sa dagan sa atong politika.

Apan mangutana ko: Unsa man gyuy nagtukmod ni Tomas pagpanaot ni Cuenco? Kinahanglan pa ba gyud nga balikbalikon ni Tomas ang iyang mga pagpanaot?

Angayan ba sa usa ka mayor ang magpunay og daot sa iyang kanhi kauban?

Kanunay’ng gibalikbalik ni Tomas ang pasangil nga si Cuenco namiya sa mga kandidato sa eleksiyon sa barangay niadtong 2007.

Kun akoy biyaan sa akong alyado masuko gyud ko.

Apan angayan pa ba nakong ibalikbalik kada adlaw ang akong pagpanaot ngadto sa tawong namiya kanako? Atong ipangutana kang Tomas, angayan pa ba nimong dauton og taman-taman si Cuenco kay lagi gibiyaan inyong alyado sa barangay election?

Dili na lang niya ilubong sa kalimot ang amigong namiya ug sa sunod eleksiyon awhagon ang tanang alyado sa dili na pagduol ug pagsuporta nianang tawhana nga makausa namiya kanato?

Sa iyang gibuhat, gibugalbugalan ni Tomas ang kasagrado sa iyang “office” isip mayor sa siyudad sa Sugbo. Dili na buhat sa usa ka mayor ang pagpanaot, pagpanglibak, ilabi na ang pagpangakusar sa iyang isig-ka-tawo.

Maayong hunahunaon niya nga naghupot siya sa taas nga posisyon sa kagamhanan sa siyudad sa Sugbo, isip chief executive.

Busa, kun wala siya'y respeto sa iyang kaugalingon pinaagi sa pagkanaog sa iyang han-ay, maayong tan-awon niya ang iyang pagka-mayor nga nagkinahanglan sa iyang respeto.

Human niya sagpaa og mga pasangil si Cuenco, si Cuenco kalma nga nanubag aron ipasabot nga dili tinuod ang mga pasangil sa mayor. Sa press conference sa iyang balay, si Cuenco ang mipasangil nga si Tomas maoy namiya sa wala pa ang barangay election ug dili siya.

Gitumbok ni Cuenco nga samtang nang-apud-apod siya og kuwarta sa mga kandidato sa barangay election, usa ka semana si Tomas didto sa Las Vegas, Nevada sa Estados Unidos aron pagtambong sa away ni Manny Pacquiao ug Marco Antonio Barrera.

Ang sulti ni Cuenco nga gagmay ra iyang nahatag tungod kay ang 2007 barangay election misunod lamang sa eleksiyon diin siya giatbangan ni Jonathan Guardo ug dako ang iyang nagasto, usa ka ‘gesture’ nga wala diay siya mopasagad sa mga kandidato nga alyado sa BOPK.

Akong nasabtan nga tingale nasuko si Tomas kay gigamyan ra ang mga kandidato sa gipanghatag ni Cuenco.

Mapugos ba diay nato ang usa ka tawo sa pagpang-apud-apod og kantidad nga dili na niya maabot?

Kun ingon niini ang punto ni Tomas, tabla ra nga gitudloan niya si Cuenco sa pagpangurakot sa pundo nga gitagana alang sa mga proyekto sa distrito aron gamiton sa eleksiyon.

Kun naanad si Tomas ngadto kang Kongresista Raul del Mar nga ingon niini ang naandan, dili na malalis nganong dunay manghilak kun mausab ang dagan sa habagatang distrito.

Wala na usab ko maka-uyon niining maong set-up.

Nganong kinahanglan magpanon ang mga kandidato pagka-kapitan ug pagka-kagawad sa balay sa usa ka kongresista pagpangayo og kuwarta atol sa eleksiyon? Unya’g mapilde maghilakhilak dayon?

Kun ipadayon og sulti ni Tomas nga ang hinungdan nga nangapilde ang mga kandidato nga alyado sa BOPK tungod sa pagbiya ni Cuenco, ako kining lalison tungod kay ako usab nahibalo sa dagan sa distrito diin mahisakop akong barangay.

Una, daghan sa 34 ka barangay sa south district nga adunay tulo ngadto sa lima ka kandidato pagka-kapitan nga pulos alyado sa BOPK.

Unsaon pagdaog kun nagka-watak-watak, wala magkahiusa?

Sama pananglit sa among barangay, duha ka kandidato – Dodong Casinillo ug Glenna Abellana — ang midagan nga alyado sa BOPK. Ang resulta, ang kontra maoy midaog.

Ang wala lang nako ma-uyoni ang pagpadayon niya og tuo nga kuwarta ang hinungdan nganong nangapilde ang mga kandidatong alyado sa BOPK sa mga kapitan nga alyado sa oposisyon. Usa kini ka sagpa natong mga Sugboanon nga padayon niyang gipaka-burigo.

Wala niya tan-awa nga wala magkahiusa ang siyudad sa Sugbo ngadto kaniya. Samtang adunay dapig niya, adunay pipila nga wala mo-bilib niya.

Nganong ang mga tawo sa barangay Cogon adto man gyud moboto kang Kapitan Eugenio “Jun” Gabuya? Kapitan Lim sa Poblacion Pardo, Kapitan Joe Navarro sa Punta Princesa ug Kapitan Mary Ann delos Santos sa Lahug? Dili man kini sila alyado sa BOPK, apan nganong padayon man moboto kanila ang mga tawo bisan nasayod sila nga ang ilang mayor mapanimaslanon?

* * *

Magsugod na og panawat og mga interesadong motuon og Japanese martial arts ang Daito Ryu Aiki Jujutsu Rengokai Kogyokan Dojo – Honbu sa Meadowland Subdivision, Pakigne Minglanilla.

Ang klase himuon sa matag Martes, Miyerkules ug Huwebes sa alas 7 hangtod sa alas 9 sa gabii. Modawat ang Kogyokan Dojo og mga bata 7-anyos hangtod 12-anyos alang sa children’s curriculum, ug 13-anyos pataas alang sa regular curriculum.

Modawat usab ang Kogyojan Dojo og special sessions sa mga tinun-an sa laing martial art schools nga gustong motuon og weapon training sama sa Kenjutsu ug Iaijutsu (Japanese sword), Jojutsu (long stick) ug uban pa.

Mahimo kamong mo-text o motawag sa 0915-7817491.