Niay paagi sa pagpangayo og uwan

Ang mosunod usa ka human interest nga balita gikan sa Quir L. de Gracia, beteranong koresponsal sa Banat News. Daghang salamat, Quir, I hope nga OK ra nimo nga anhi nato ipatik ang akong estorya.

* * *

Aniay usa ka talagsaon nga paagi sa pagpangayo og uwan panahon sa tinghulaw. Morag kataw-anan kini apan tinuod kini didto sa nasud sa India diin miigo karon ang usa ka dakong hulaw.

* * *

Nagtuo ang mga mag-uuma sa India nga mobuhagay ang uwan kun ang ilang padarohon sa yuta mao ang ilang mga dalagang anak ug kini sila pahubuon nga wa gayu'y salimbong ang kalawasan. Kataw-anan ba? Morag kataw-anan apan tinuod.

* * *

Ang mga nakasaksi niini nag-ingon nga ang mga hubo nga babaye maoy modaro ug mag-awit sa ilang karaang himno kon hymn. Ang mga hamtong nga babaye, kinsa naghubo usab, moabag sa pagbira sa daro.

* * *

Ang pagdaro himoon inigka sawop sa adlaw. Gihimo kini sa mga mag-uuma sa probinsiya sa Bihar ug suma pa sa balita karaan na kini nga tradisyon sa mga mag-uuma didto. Epektibo kuno kaayo kini nga paagi sa pagpangayog uwan.

Matud pa sa mga mag-uuma, ang pagpadaro sa uma sa ilang mga dalagang anak nga naghubo dili lang kay makapabundak sa uwan kundili usab makapadako sa ilang ani. Garantisado kuno kining paagiha.

* * *

Kining paagiha sa pagpangayog uwan dili mahitabo dinhi sa ato kay naay daghang nagbantay sa mga pagpangabuso sa katawhang katungod sa atong mga babaye.