Minors

Naunsa na ba ang panahon karon grabe na man kaayo ka loog. Ang nakapait pa gyod kay ang nalambigit sa mga linoog nga binuhatan mao ang mga minor de edad nga gipanalipdan sa atong balaud gikan sa prosecution.

Kaniadtong miaging adlaw usa ka 18 anyos nga tinun-an sa Kanasuhan National High School ang patay human bunali sa iyang classmate nga 15 anyos og dos por dos ang ulo niini samtang nag-akbo nga natulog sa iyang lingkuranan sulod mismo sa ilang classroom. Gamay lang gyod kaayo ang hinungdan sa krimin. Gipaninglan lang og 10 pesos ang responsable para sa ilang ipa-burn nga CD nga gamiton sa sayaw.

 Kaniadtong Sabado lain usab nga biktima sa linoog nga krimin ang napalgang patay sa may Barangay Buhisan.15 metros intawon ang gilayon sa ulo sa biktima gikan sa iyang lawas sa dihang napalgan sa mga tawo sa maong dapit ug mga police. Usa sa mga suspetsado 16 anyos.

Sa miagi pong semana usa ka Norwegian national ang napatay sa usa gihapon ka minor de edad. Naunsa na hinoon ni! Mura man og nagbahis na ang mga minor de edad. Nagsalig kaha ni sila kay way criminal liability ubos sa atong balaud?

Daghan ang misaway sa Juvenile Law tungod kay nagdasig lamang kini sa mga bata nga mamahimong kriminal. Ang mga kriminal nakakita upod og maayong taming sa ilang mga kriminal nga kalihokan tungod mogamit naman lang sila og mga minor de edad kay di man kini masulod sa prisohan.

Dili makiangayon kang Kiko kun siya lang ang basulon sa epekto sa balaud nga iyang gipangamahanan. Kini tungod kay ang Juvenile Law dili mamahimong balaud kun wala pa kini suportahi sa mga senador ug mga kongresista. Ug labi pa gyod nga di kini mamahimong balaud kun wa pa kini pirmahi ni Pangulong Arroyo.

Panahon na seguro nga tun-an pagbalik ang Juvenile Law tungod kay wa kini moserbi sa iyang tumong.