Tubig nga hugaw

CEBU, Philippines - Tungod kay ang mga tubo sa tubig sa Metro Cebu Water District (MCWD) tayaon na man kaayo kay wala man kini ilisi pa sa daghan nang katuigan, ubay-ubay sa katawhan ang mihukom nga mogamit na lang og “bottled water” nga gikan sa mga private water refilling stations.

Kay matud pa nila “health is wealth,” bisan og lisud karon ang kahimtang sa atong ekonomiya, mapugos gihapon kita pagpalit og “bottled water” sa pagtoo nga kini limpyo ug nga luwas nga imnon.

Tungod niini, midagsang pag-ayo ang mga water refilling stations. Daan na ko nga nagduda kun wala ba kaha’y nagbinuang lang kanila nga basta-basta na lang nga mobutang og tubig diha sa plastic containers nga gibaligya na lang karon og tag P25 ngadto sa P35.

Duna ko’y kaugalingong kasinatian kaniadtong Huwebes sa buntag. Nabantayan nako sa “bottled water” nga akong napalit nga dunay mga hugaw.

Apan misamot ang akong kakurat pagka kita nako nga didto sa sulod dunay duha ka “guyo-guyo,” kanang anak bitaw sa lamok.

Gipahibalo dayon nako niini ang sub-dealer sa maong bottled water nga amo ra nga silingan. Hangtud gani karon, ang kabahin sa tubig nga dunay guyo-guyo ako pang gitipigan.

Ang plastic container nga gisudlan sa tubig dunay marka nga “Free Flow,” nagtoo ko nga mao kini ang supplier sa tubig.

Apan giingnan ko sa akong gipalitan nga ang tubig dili gikan sa Free-flow refilling station, kun dili gikan sa Century Spring, lain nga refilling station nga migamit ra diay sa container sa Free-flow.

Gitawgan dayon nako ang refilling station ug gipadangat nako kanila ang akong reklamo. Miinsister sila nga limpyo kuno ang ilang tubig. Akong gihuna-huna pag-ayo ug mao kini ang akong konklusyon.

Mahimo nga ang inyong kahimanan sa pag-purify sa tubig nakapasar sa gilatid sa Bureau of Food and Drugs o sa Department of Health, apan ang dili imposible nga dunay empleyado sa maong water refilling station nga nagtinapolan.

Mag-ilis-ilis lang ang mga botelya kun plastic container sa tubig. Kadtong baseyo na gikan sa mga customers, ilang sudlan ug ibalik na usab pagbaligya. Dunay mga botelya nga bukas na ang ba-ba nga posibleng ma-standby usa ka pila ka adlaw sa dili pa masudlan og balik.

Anhi nga higayona nga dili imposible nga dunay mga lamok nga makasulod og makapangitlog. Kun dili hugasan pag-ayo diha sa mga water refilling stations ang botelya, dili imposible nga ang itlog sa lamok mahimong guyo-guyo ug mainom sa mga customers.

Bisan ang sub-dealer nga among silingan, nakaobserbar g’yod nga hugaw ang sulod nga bahin sa container dapit sa lubot. Paminaw nako, ang nagtinapolan nga empleyado sa Century Spring mideritso lang og butang sa tubig nga walay hugas-hugas.

Gikan kagahapon, mibalhin na ko og kuhaanan og tubig. Ang among mga silingan nagplano na usab nga moundang sa pagpalit sa produkto niining Century Spring. Tan-awa og unsay kadaut nga nahimo sa inyong pagpasagad.

Awhagon nako ang BFAD nga mohimo sila og kanunay’ng pakisusi sa mga water refilling stations, ilabi na niining Century Spring diha sa barangay Apas.