Ayoha'g plansa

Daghan pa g’yod tuod ang angay’ng diskutihon kabahin sa lakang ni Mayor Tomas Osmeña nga ang Cebu City Medical Center dili na modawat og pasyente nga dili lumolupyo dinhi sa dakbayan.

Ang paagi god karon mao nga ang mga pasyente nga gustong magpa-admit sa CCMC adto usa mokonsulta sa mga barangay health centers. Kun masuta nga kinahanglan g’yod nga ang pasyente i-admit, mohimo kini og endorsement.

Apan unsay mahitabo kun dunay pasyente nga moadto sa mga barangay health centers panahon sa gabii? Duna ba go’y mga kawani nga nag-duty sa mga barangay health centers sa gabii?

Usa kini sa punto nga angay’ng tukion pag-ayo aron dili mangasuko ang katawhan sa mga opisyal sa dakbayan.

* * *

Kay adto na man unya modangop sa mga health centers sa kabarangayan ang mga pasyente, magpasabot nga magkinahanglan na kita og dugang manpower. Mga doctor o mga nurses.

Pagka karon, 85 ka health centers ang ania sa lainlaing 80 ka barangay sa dakbayan sa Sugbo. Dunay mga barangay nga tag duha ang ilang health centers.

Apan mao lagi, pipila ra ka health centers nga duna g’yoy permanenteng doctor nga gidistino. Ang ubang doctor gidistino og duha o tulo ka health centers. Sa ato pa, magtapon-tapon tawon sila.

Unsaon nga ang city health department duna ra may 36 ka doctor nga gidistino sa field program. Mao nga si Mayor Osmeña mimando nga mo-hire ang dakbayan og dugang doctor.

Maayo ba god nga tagsaan og doctor ang mga health center sa kabarangayan? Ang higala nako nga opisyal sa city health department miingon nga dili maayo kay posibleng dunay doctor nga matulog lang.

Sa mga gagmay god nga barangay, tagsa ra ang magpa-check-up mao nga kun ang barangay health center distinohan g’yod og doctor, hayan mausik lang kuno ang atong kwarta nga gisweldo.

Ikaduha, ang mga nurses gitudloan man sa paghatag og mga tambal alang sa mga yanong sakit, sama sa sip-on ug ubo.

Buyno, panid-an lang nato unsay epekto sa bag-ong pamaagi sa City Hall kun molambo naba g’yod ang serbisyo sa CCMC ngadto sa publiko. Apan kun ako pa lagi, dugangan nako ang budget alang sa ospital.

* * *

Ang bag-ong hepe sa Land Transportation Office (LTO) nga si Assistant Secretary Arturo Lomibao buot g’yod nga mohashas sa mga LTO deputized agents aron tingali wad-on na kadtong dunay dili maayong kalihukan.

Maayo usab nga i-centralize na ang pag-isyu sa mga deputization ID aron matan-aw kadtong mga wala maayong performance, ilabi na kadtong may mga dautang report nga kusog kaayong mangilkil, wad-on na sa LTO.

Dinhi hinuon sa dakbayan sa Sugbo, bilib na man g’yod ko sa kalihukan sa Task Force Alpha. Dili sila modawat og “agents” nga walay trabaho. O bisan og dunay trabaho apan walay klaro ang sweldo, dili dawaton.

Usa kini sa paagi nga malikayan nga ang mga LTO agents matintal sa pagdawat og suborno gikan sa mga madakpang drayber.

Ako lang, kadaghan na ko gitanyagan og kwarta kay aron dili dakpon ang mga masalaypong drayber, apan ang akong tumong mao ang pagtudlo og leksyon sa mga abusado.

Kun makamulta sila og dagko, sigurado man ko nga magpangutkot sila’s ulo ug makahinulsol sa ilang sayop. Apan kadtong manawat og suborno, makapasamot sila kadaghan sa mga abusadong drayber nga ubos na hinoon og tan-aw sa mga enforcers.