Isang karatula at dalawang tanong

Karatula ito sa isang shop sa Cebu City, Ingles sa orihinal: “Mas nanaisin namin maka-negosyo sina President GMA, Secretary Gonzalez, Estrada, FG Mike A., at lahat ng maka­pangyarihan sa Kongreso at PNP — kaysa isa man lang na konserbatibong Pilipino.”

Malamang magalit ka sa nilalaman ng tila mapang­matang anunsiyo. Pero lipunan tayo na nagtataguyog ng malayang pananalita bilang pinaka-mahalagang karapatan. At kung tutuusin, karatula lang naman ‘yon. Tiyak nais niyo malaman kung ano ang negosyo ng nagkaratula.

Sagot: “Funeraria Lahug”.

Ngayon naman, dalawang mahihirap na tanong: Una: Kung kilala mo itong inang buntis, na meron nang walong anak — tatlo sa kanila ay bingi, dalawa ay bulag, at isa ay sintu-sinto — at siya ay merong syphilis, ipapayo mo bang magpa­laglag na lang siya?

Mahirap ba? Bago basahin ang sagot sa ilalim, bunuin muna ang ikalawang tanong: Hahalal ng lider ng mundo, boto mo ang magpapanalo sa isa sa tatlong kandidato, kaya sino ang pipiliin mo? Si Candidate A ay katoto ng mga tiwaling politiko, dalawa ang kabit, malakas mani­garilyo’t uminom, at pala-asa sa manghuhula. Si Candidate B ay dalawang beses sinipa sa puwesto, tang­hali kung bumangon, nag-opium nu’ng kolehiyo, at nagwi-whiskey gabi-gabi. Si Candidate C ay namedal­yahang bayani ng digmaan, vegetarian, hindi nanini­garilyo, at hindi nagloko sa asawa.

Kung si Candidate A ang pinili mo, siya’y si Franklin D. Roosevelt. Kung si Candidate B, siya si Winston Churchill. Kung si Candidate C, aba’y hinalal mo si Adolf Hitler. At kung pina­yuhan mo;ng magpalaglag ang ina, pinatay mo si Beethoven.

O sige, bonus question: Magtatrabaho ka ba sa organi­sasyon na may 270 kasapi, na di bababa sa apat ang kapamilya ng mangu­ngulimbat, isa ay kapatid ng rapist, pito ay naka­patay, mahigit kala­hati ay may kabit, 174 ay hayok sa poder, at halos lahat ay kumukupit mula sa sariling pondo?

’Yan ang Kamara, na nagsasabatas ng mga wastong gawi daw natin.