Bidlisiw sa paglaom

Sama sa naandan ania ako karon naglingkod sa akong kinaham nga lantay nga kawayan. Namalandong ako ug nagmahay sa akong pagkamapasagaron nga hapit muhatod kanako sa kamatayon.

Nagmahay ako kun ngano nga wala ko makapugong sa akong kaugalingon sa pagkaon sa sobra nga pagkaon. Wala ako'y dili kan-on. Mukaon ako sa pagkaon basta dili makahilo.

Ang paborito kong mga pagkaon naglangkob sa bibingka sa Mandaue City, inasal sa Talisay City ug ampaw ug sitsaron sa Carcar City. Mukaon ako sa parat, minantikaan ug tam-is nga pagkaon. Dili gayod ako moundang sa pagkaon hangtod dili mobusdik ang akong tiyan sa kabusog.

Mo-snacks usab ako bisan og busog pa. Imnon ko usab kaniadto ang tanang ilimnon basta dili makahilo. Nainom ko na ang Johnny Walker, Fundador, Tanduay, Anejo, Kulafu, Chivas Regal, Swing, tuba, lambanog ug uban pa.

Sobra usab ang akong kahago sa trabaho. Motrabaho ako bisan kun wala pa ko makapahulay pag-ayo. Mao kana ang giatake ako sa kasingkasing sa ikatulo ka higayon.

Nga nisangpot sa akong pagkarabanit. Apan akong nahunahuna nga dili maayo nga magsisi ako og hunahuna sa akong kagahapon. Kay kini dili ko na ikabalik pinaagi sa pagbakho kanunay.

Ang akong maayong buhaton mao ang paggamit sa nahabilin kong kusog, pagbarog ug paglakaw aron sa pagsugat sa laing bidlisiw sa paglaom sa akong kinabuhi.